ہونڈا پاکستان نے سِوک کو ایک نئے رنگ کے ساتھ متعارف کروانے کا فیصلہ کیا ہے۔ باضابطہ اعلان سے قبل ہی ہونڈا سِوک 2018 (اور 2017) کی تصاویر آن لائن منظر عام پر آگئیں ہیں۔ ہونڈ ایلٹس نے اب تک اپنی ویب سائٹ پر اس رنگ سے متعلق کوئی اعلان یا تفصیلات شائع نہیں کیں۔ اس کے علاوہ نئے رنگ کے نام اور اس کی دستیابی سے متعلق معلومات بھی تاحال سامنے نہیں آئیں۔ اس صورتحال کو دیکھتے ہوئے کہا جاسکتا ہے کہ آئندہ سال ہونڈا سِوک 2018 کم از کم ایک یا ایک سے زائد نئے رنگوں کے ساتھ بھی پیش کی جاسکتی ہے۔
یہ بھی پڑھیں: ہونڈا N-WGN کسٹم کا تفصیلی جائزہ
ہونڈا کے لیے موجودہ صورتحال بہت زیادہ مثبت نہیں کہی جاسکتی۔ ہونڈا سِوک کا ٹربو ماڈل پہلے یہ پاکستانی ایندھن کے باعث ‘جواب’ دے رہا ہے اور مستقبل قریب میں اس کی فروخت (کچھ وقت کے لیے) بند کیے جانے کے خدشات ہیں۔ اس کے بعد ہونڈا سِٹی میں شامل کیا جانے والے اینٹینا کا خمار ہے۔ میرا نہیں خیال کہ اب لوگ ہونڈا کی ان بچگانہ حرکتوں سے بے زار ہوچکے ہیں جو وہ اپنے صارفین کو بہلانے کے لیے وقتاً فوقتاً کرتا رہتا ہے۔
آج کل بہت سے ادارے نت نئے رنگوں کی پیشکش اور ان کے منفرد نام رکھنے میں اپنی توانائیاں صرف کر رہے ہیں۔ چاہیں تو موبائل فون بنانے والے اداروں سام سنگ اور ہواوے ہی کو دیکھ لیں جو عجیب و غریب ناموں والے رنگوں کے ساتھ موبائل فونز متعارف کروا رہے ہیں۔ سام سنگ S8 کو مڈنائٹ بلیک (سیاہ)، آرچڈ گرے (بھورا) اور آرکٹک سِلور (نقرئی/چاندی) کے رنگ میں فروخت کے لیے پیش کیا گیا ہے۔ اس کے علاوہ ٹویوٹا کو دیکھیں تو وہ ایچیٹیوڈ بلیک (سیاہ)، فینٹم برو (بھورے) اور ڈوراڈو گولڈ (سنہری) رنگ پیش کر رہا ہے۔ خود ہونڈا کی فہرست میں بھی بریلیئنٹ اسپورٹی بلیو میٹالک (نیلا)، کارنیلیئن ریڈ (سرخ)، اور لونار سلور میٹالک (نقرئی/چاندی) جیسے عجیب و غریب رنگ موجود ہیں۔
بہرحال، ہونڈا سِوک 2018 میں پیش کیے جانے والے نئے رنگ کا حتمی نام بتانا ابھی ناممکن ہے البتہ یہ بات یقینی ہے کہ دیگر رنگوں کی طرح اسے بھی کوئی بہت منفرد اور اعلی پائے کا نام دیا جائے گا۔
کہنے کا مطلب یہ ہے کہ ان عجیب اور مشکل سے نام رکھنے کے بجائے اگر ہونڈا اسے وہی نام دے جو اس رنگ کا اصل نام ہے اور جیسا یہ حقیقت میں نظر آتا ہے، تو بھلا اس میں برائی ہی کیا ہے؟ خیر، ہونڈا اسے جو چاہے نام دے، مجھے تو یہی لگتا ہے کہ لوگ اسے “املی” کے نام سے ہی پکاریں گے۔ کیوں؟ وہ اس لیے کہ یہ رنگ ہے ہی املی کا۔ تو بس پھر انتظار کیجیے اس وقت کا کہ جب آپ کو “امی والی سِوک” سڑک پر دوڑتی ہوئی نظر آجائے۔
آپ اس نئے رنگ کے بارے میں کیا سوچتے ہیں؟ اچھا ہے یا فضول؟ ہمیں ضرور بتائیے۔ اور ہاں، اس کا نام بھی بتائیے کہ آپ اس کو کیا کہنا پسند کریں گے؟ کیا املی کہنا ٹھیک ہوگا یا پھر اس پر کوئی اور نام زیادہ جچے گا؟ تبصرے میں اپنی رائے دینا مت بھولیے گا۔
