گزشتہ روز ہم نے پاک ویلز کے قارئین کو بتایا تھا کہ ہونڈا ایٹلس (Honda) نے پاکستان بھر کے ڈیلرشپس کو ایک خط ارسال کیا ہے جس میں نئی سِوک 2016 کی تعارفی قیمت اور اس میں شامل خصوصیات کی تفصیل بھی شامل ہے۔ تاہم اب تک یہ بات یقینی نہ تھی کہ ان تفصیلات کو عوام کے لیے بھی پیش کیا جائے گا یا پھر یہ معلومات صرف انہی لوگوں تک محدود رکھی جائیں گی جو ڈیلرشپس جا کر سِوک بُک کروانے میں دلچسپی کا اظہار کریں گے۔
مزید پڑھیں: پاکستان میں ہونڈا سِوک 2016 بُک کروانے کا طریقہ
ہونڈا ایٹلس نے اپنی ویب سائٹ کی تازہ ترین اپڈیٹس میں نئی سِوک کی پیش کش اور ان تمام تفصیلات کو بھی شامل کردیا ہے جو پہلے صرف ڈیلرشپس کو فراہم کی جاتی رہی تھیں۔ تازہ ترین اپڈیٹ میں نہ صرف نئی سِوک کے دونوں ماڈلز کی تعارفی قیمتیں درج ہیں بلکہ پیشگی ادائیگی کو کُل رقم کا 50 فیصد کرنے کا بھی اعلان شامل ہے۔ یوں اب صارفین کو سِوک 1.8 بُک کروانے کے لیے 12 لاکھ 50 ہزار روپے جبکہ سِوک ٹربو بُک کروانے کےلیے 15 لاکھ روپے کی پیشگی رقم جمع کروانا ہوگی۔ اس سے قبل یہ دونوں ہی ماڈل صرف 10 لاکھ روپے میں بُک کروائے جاسکتے تھے۔ یاد رہے کہ سِوک (Honda Civic 2016) بُک کروانے کے لیے دی جانے والی پیشگی رقم ناقابل واپسی ہے۔
