گذشتہ دنوں خبریں سامنے آئیں کہ پڑوسی ملک بھارت نئی سوزوکی بلینو (Suzuki Baleno) کو جاپان سمیت 100 ممالک میں برآمد کرے گا۔ اس کی شروعات آج سوزوکی کے آبائی وطن جاپان سے ہوچکی ہے کہ جہاں بھارت میں تیار شدہ سوزوکی بلینو کو 2 مختلف انجن کے ساتھ پیش کردیا گیا ہے۔
نئی سوزوکی بلینو کو 1250 سی سی K- سیریز ڈیول جیٹ پیٹرول انجن اور ایک نئے بوسٹر جیٹ 1000سی سی انجن 3-سلینڈر ٹربوچارجڈ پیٹرول انجن کے ساتھ پیش کیا گیا ہے۔1250 سی سی K-سیریز ڈیول جیٹ انجن سوزوکی بلینو XG ے ساتھ پیش کیا جائے گا۔ اس میں انجن کو CVT گیئرباکس کے ساتھ منسلک کیا گیا ہے جو 90 بریک ہارس پاور اور 118 نیوٹن میٹر ٹارک فراہم کرسکتا ہے۔ جاپانی JC08 ڈرائیونگ سائیکل میں اس گاڑی نے فی لیٹر 24.6 کلومیٹر سفر کیا۔ بلینو XG میں متعدد خصوصیات شامل ہیں جن میں ESP، ہِل ہولڈ اور ریڈار کی مدد سے گاڑی کو روکنے کا نظام شامل ہے۔
یہ بھی پڑھیں: ٹویوٹا کرولا میں متعدد خصوصیات کا اضافہ؛ قیمتیں بھی بڑھادی گئیں!
ٹربو چارجڈ انجن کی حامل گاڑی کو سوزوکی بلینو XT کا نام دیا گیا ہے۔ اس میں شامل انجن 6-اسپیڈ آٹومیٹک ٹرانسمیشن سے منسلک ہے۔ یہ انجن 109 بریک ہارس پاور اور 160 نیوٹن میٹر ٹارک فراہم کرسکتا ہے۔ صارفین اسے پیڈل شفٹرز کے ساتھ بھی حاصل کرسکتے ہیں۔ جاپانی JC08 ڈرائیونگ سائیکل میں بلینو XT نے ایک لیٹر میں 20 کلومیٹر سفر کیا۔ اس میں 16 انچ کے الائے ویلز، کروز کنٹرول جیسی خصوصیات شامل ہیں جبکہ اندرونی حصے میں چمڑے کا استعمال کیا گیا ہے۔
پاک سوزوکی آئندہ پانچ سالوں کے دوران کم سے کم دو نئے ماڈلز پیش کرے گی۔ پاکستان میں سوزوکی نے اپنی مشہور گاڑیوں مثلاً سوزوکی مرگلہ اور سوزوکی بلینو سے کافی کامیابیاں سمیٹی ہیں۔ تاہم ان کے بعد پیش کی جانے والی سوزوکی لیانا خلاف توقع خاطر خواہ کامیابی سمیٹنے میں ناکام رہی۔ اب دیکھنا ہوگا کہ پاک سوزوکی بھارت میں کامیابی کے ریکارڈ قائم کرنے والی اس نئی سوزوکی بلینو کو پاکستان میں کب پیش کرتی ہے۔ اگر وہ جلد ایسا کرتے ہیں تو سوال پیدا ہوتا ہے کہ آیا اسے بھارت سے مکمل تیار شدہ حالت میں درآمد کیا جائے گا یا پھر پاکستان ہی میں اس کی تیاری ممکن ہوسکے گی۔ہم امید کرتے ہیں حکومت پاکستان جلد نئی آٹو پالیسی کا اعلان کر کے گاڑیوں کے شعبے پر چھائے سکوت کو جلد توڑے گی اور نئے و موجودہ کار ساز اداروں کے لیے صورتحال مزید واضح ہوگی۔
آسان اقساط پر نئی سوزوکی گاڑیاں حاصل کرنے کے لیے یہاں کلک کریں
