سوزوکی ویگن آر پاکستان میں مقبولیت حاصل کرنے والی گاڑیوں میں شامل ہے۔ 8 سے 10 لاکھ روپے میں دستیاب یہ گاڑی ابتدا میں زیادہ حوصلہ افزا نتائج تو نہ دے سکی تاہم وقت کے ساتھ ساتھ یہ پاکستانی خریداروں کو اپنی طرف متوجہ کرنے میں کامیاب ہورہی ہے۔ گو کہ پاکستان میں تیار کی جانے والی دیگر گاڑیوں کی نسبت سوزوکی ویگن آر میں کئی ایک منفرد خصوصیات ہیں تاہم اسے مزید بہتر بنانے کے شوقین افراد کے لیے سوزوکی ویگن آر نے ایک نیا پیکیج بھی متعارف کروادیا ہے۔ اس پیکیج میں ویگن آر (Suzuki WagonR) کا ظاہری انداز خوبصورت بنانے کے لیے متعدد چیزیں شامل ہیں۔
1) دروازوں کے لیے وائزرز
انہیں عرف عام میں Door Visors کہا جاتا ہے۔ یہ نہ صرف گاڑی کی خوبصورت میں اضافہ کرتے ہیں بلکہ دروازوں کے شیشے سے سورج کی روشنی اور بارش کا پانی داخل ہونے سے بچانے کے لیے مفید ہیں۔ اس کے علاوہ یہ گاڑی میں تازہ ہوا کی آمد و رفت کے لیے بھی مددگار سمجھے جاتے ہیں۔ پاک سوزوکی (Suzuki) ویگن آر کے دروازوں کے لیے وائزرز 6,160 روپے میں فراہم کر رہی ہے۔
یہ بھی پڑھیں: کیا جاپانی ویگن آر واقعی پاکستانی ویگن آر سے زیادہ اچھی ہے؟
2) گاڑی کے پیچھے بالائی اسپوائلر
انہیں عام طور پر Rear Upper spoiler کہا جاتا ہے۔ جیسا کہ نام سے ظاہر ہے انہیں گاڑی کے پشت پر موجود شیشے کے اوپر لگایا جاتا ہے۔ اکثر گاڑیوں میں انہیں شامل کرنے کا مقصد محض گاڑی کی دلکشی میں اضافہ ہی ہوتا ہے۔ انہیں اکثر اگلے پہیوں کی قوت سے چلنے والی گاڑیوں (FWD) میں دیکھا جاتا ہے تاہم لوگوں کا یہی کہناہے کہ ان سے گاڑی کی کارکردگی پر کوئی اثر نہیں پڑتا۔ البتہ کچھ لوگوں کا خیال ہے کہ اس سے گاڑی کے ایروڈائنامکس بہتر ہوتی ہے اور یہی وجہ ہے کہ انہیں برق رفتار گاڑیوں کا بنیادی جزو سمجھا جاتا ہے۔ دور جدید کی نئی اسپورٹس گاڑیوں کے عقب میں شامل یہ اسپائلر گاڑی کی رفتار کے مطابق اپنا رخ تبدیل کرتا رہتا ہے۔ سوزوکی ویگن آر کے پیچھے اسپوائلر شامل کر کے آپ اسے اسپورٹی انداز دے سکتے ہیں۔ پاک سوزوکی اسے صرف 14,696 روپے میں فراہم کر رہی ہے۔
3) دھند میں نظر آنے والی تیز روشنیاں
پاکستان کے اکثر بالائی علاقوں میں دھند کے باعث سفر ممکن نہیں ہوپاتا۔ البتہ وہ گاڑیاں باآسانی سفر کرسکتی ہیں کہ جن میں دھند میں نظر آنے والی تیز روشنیاں یعنی Fog Lamps لگےہوں۔ ان روشنیوں کی مدد سے دھند کے باوجود ڈرائیور صاحبان باآسانی آگے کا منظر دیکھ سکتے ہیں یوں دوران سفر کسی بھی ممکنہ حادثات سے بھی حفاظت ممکن رہتی ہے۔ پاک سوزوکی ویگن آر میں یہ سہولت 18,925 روپے میں فراہم کر رہی ہے۔
4) گاڑی کے آگے زیریں اسپوائلر
گاڑی کے اگلے حصے کو مزید دلکش بنانے والے اسپوائلر کو Front under spoiler کہا جاتا ہے۔ انہیں شامل کر کے آپ سوزوکی ویگن آر کی ایروڈائنامکس کو مزید بہتر بناسکتے ہیں جس سے طویل شاہراہوں پر سفر کا بہتر تجربہ حاصل ہوتا ہے۔ پاک سوزوکی ویگن آر کے اگلے اسپوائر صرف 18,404 روپے میں فراہم کر رہی ہے۔
یہ بھی پڑھیں: پاک سوزوکی ویگن آر بمقابلہ درآمد شدہ ویگن آر – ایک مختصر جائزہ
5) گاڑی کے پیچھے زیریں اسپوائلر
جس طرح Front under spoiler گاڑی کے اگلے حصے کو مزید دلکش بناتے ہیں اسی طرح گاڑی کے پیچھے نچلے حصے میں بھی اسپوائلر لگایا جاسکتا ہے۔ انہیں Rear under spoiler کے نام سے پکارا جاتا ہے۔ ان سے بھی گاڑی کی ایئروڈائنامکس میں بہتری اور انداز میں مزید جاذبیت پیدا ہوتی ہے۔ پاک سوزوکی اپنی ویگن آر میں انہیں صرف 16,956 روپے میں شامل کرنے کی سہولت فراہم کر رہا ہے۔
6) دائیں و بائیں جانب مولڈنگ
یہ گاڑی کے رنگ سے مشابہ اضافی پلاسٹک اسٹرپ ہے جنہیں عام طور پر گاڑی کے دروازوں پر لگایا جاتا ہے۔ اس سے گاڑی دائیں اور بائیں جانب سے مزید بہتر نظر آتی ہے۔ پاک سوزوکی انہیں 9,463 روپے میں فراہم کر رہی ہے۔
7) دائیں و بائیں جانب زیریں اسپوائلرز
جس طرح اگلی اور پچھلی جانب گاڑی کے نچلے حصے میں اسپوائلر شامل کیے جاتے ہیں اسی طرح گاڑی کے دائیں اور بائیں جانب موجود دروازوں کے نیچے بھی اسپوائلر شامل کرنے کی سہولت دستیاب ہے۔ انہیں عام طور پر Side under spoilers کہا جاتا ہے۔ انہیں شامل کرنے کا مقصد بھی گاڑی کے ایروڈائنامکس میں بہتری لانا ہے۔ پاک سوزوکی انہیں 25,491 روپے میں فراہم کر رہی ہے۔
پاکستانی ویگن آر میں مذکورہ بالا تمام اضافی خصوصیات شامل کرنے پر کُل 1,10,095 روپے لاگت آتی ہے تاہم پاک سوزوکی بیک وقت تمام خصوصیات شامل کرنے والے صارفین کو 93,699 روپے کی رعایتی قیمت میں فراہم کر رہی ہے۔ دلچسپ بات یہ ہے کہ ان تمام چیزوں کو گاڑیوں کی کسی بھی عام مارکیٹ سے تقریباً نصف قیمت میں لگوایا جاسکتا ہے البتہ ان کے معیار میں کمی بیشی کی وجہ سے قیمت میں فرق ہوسکتا ہے۔
