کار ساز اداروں کے درمیان سب سے زیادہ گاڑیاں بیچنے کا مقابلہ تو ہمیشہ سے ہی جاری ہے لیکن کیا کبھی آپ نے یہ جاننے کی کوشش کی کہ دنیا میں سب سے زیادہ کونسی گاڑیاں گوگل کی جاتی ہے؟ یا دوسرے لفظوں میں کہا جائے تو گاڑی بنانے والا کس ادارے میں لوگ سب سے زیادہ دلچسپی رکھتے ہیں؟ ہم نے گوگل کی جانب سے جاری ہونے والی سالانہ ٹرینڈ رپورٹ 2014 سے گاڑیوں کے متعلق دلچسپ اعداد و شمار جمع کیے جو آپ کی خدمت میں پیش ہیں۔
دنیا میں سب سے زیادہ گوگل کی جانے والی گاڑیوں کا تعلق کسی اور سے نہیں بلکہ ‘فورڈ’ سے ہے۔ اس کے بعد ‘جیپ’ اور پھر ‘ڈوج’ بالترتیب دوسرے اور تیسرے نمبر پر آتے ہیں۔ دلچسپ بات یہ ہے کہ سرچ ٹرینڈز کے اعداد و شمار سالانہ فروخت میں سر فہرست اداروں سے بالکل مختلف ہیں۔ سال 2014 میں گاڑیاں فروخت کرنے کے حوالے سے ٹویوٹا 102.3 لاکھ گاڑیاں فروخت کر کے پہلے اور واکس ویگن 101.4 لاکھ گاڑیاں فروخت کر کے دوسرے جبکہ جنرل موٹرز 99.2 لاکھ گاڑیاں فروخت کر کے تیسرے نمبر پر تھیں۔
دنیا بھر میں فورڈ کو سب سے زیادہ سرچ کیے جانے کی وجہ موسٹانگ اور ایف-150 کے نئے ماڈلز تھے جنہیں گو کہ خریدنا بہت سے لوگوں کے لیے مشکل ضرور ہے لیکن گوگل کرنا بہت آسان ہے۔
پاکستان میں سب سے زیادہ گوگل کی جانے والی گاڑیوں میں ٹویوٹا اور لامبورگینی شامل رہیں۔ اس سے اندازہ لگایا جاسکتا ہے کہ یہاں لوگ جتنا ٹویوٹا کو پسند کرتے ہیں اتنا ہی لامبورگینی کی گاڑیوں میں بھی دلچسپی رکھتے ہیں۔
آئیے اب دیکھتے ہیں کہ دنیا کے دیگر حصوں میں کونسے کارساز اداروں کی گاڑیوں میں لوگوں نے زیادہ دلچسپی لی۔ نقشے میں موجود ہر ملک کے اوپر سب سے زیادہ گوگل کی جانے والی گاڑیوں کی کمپنی کا لوگو شامل کیا گیا ہے۔
