خبریں گردش کر رہی ہیں کہ پاک سوزوکی نے برسہا برس سے چلنے والی سوزوکی مہران کو اپریل 2019ء سے بند کرنے کا فیصلہ کرلیا ہے۔
ایک عرصے سے سوزوکی مہران کے خاتمے کی توقع کی جا رہی تھی اور لگتا ہے کہ آخرکار سوزوکی پاکستان نے اس پر آخری مہر لگانے کا فیصلہ کرلیا ہے۔ وینڈرز کو جاری کردہ نئے نوٹیفکیشن کے مطابق، VXR مہران کی پروڈکشن اگلے سال اپریل سے بند کردی جائے گی۔ یاد رہے کہ جولائی 2018ء میں کمپنی نے ایک نوٹیفکیشن جاری کیا تھا جس میں سوزوکی مہران کے VX ماڈل کو نومبر 2018ء سے بند کرنے کی اطلاع دی گئی تھی۔
سرکلر میں پروڈکشن کے آخری مہینے یعنی مارچ 2019ء تک تیار کیے جانے والے مہران VXR یونٹس کی تعداد بھی بتائی گئی ہے۔
البتہ پاک سوزوکی انتظامیہ کے مطابق، متعلقہ نوٹیفکیشن پروڈکشن ڈپارٹمنٹ کی جانب سے وینڈرز کو جاری کیا گیا ہے۔ نیز، مینجمنٹ کا کہنا تھا کہ مہران کمپنی کی بیسٹ سیلر گاڑی ہے اور مارکیٹ میں نئے ماڈلز متعارف کروائے بغیر کوئی بھی پرانی گاڑی ختم نہیں کی جائے گی۔
ماہانہ اعتبار سے پروڈکشن نمبر درج ذیل ہیں۔
| ماڈل | ستمبر 2018 | اکتوبر 2018 | نومبر 2018 | دسمبر 2018 | جنوری 2019 | فروری 2019 | مارچ 2019 |
| SB 308 سوزوکی مہران VXR | 2661 | 2475 | 1335 | 3502 | 4033 | 3325 | 1916 |
پاک سوزوکی کا نوٹیفکیشن اپنے سپلائرز سے یہ بھی درخواست کرتا ہے کہ سرپلس سے بچنے کے لیے مطلوبہ پرزہ جات کی ضروری تعداد فراہم کریں۔
مہران کی پروڈکشن اواخر 1988ء سے جاری ہے یعنی یہ 30 سال پرانی ہیچ بیک گاڑی ہے۔
اس خبر سے متعلق مزید تازہ ترین خبروں کے لیے پاک ویلز ڈاٹ کام دیکھتے رہیے۔
