لاہور میں موٹرسائیکل سواروں کے خلاف مہم شروع

islamabad-police 1.0

لاہور ٹریفک پولیس کے سربراہ طیب حفیظ چیمہ نے بغیر ہیلمٹ سفر کرنے والے موٹر سائیکل سواروں کے خلاف کاروائی کا حکم دے دیا ہے۔ یاد رہے کہ مختلف موٹر سائیکل تیار کرنے والے اداروں کے تعاون سے ٹریفک پولیس نے 1200 ہیلمٹس مفت تقسیم کیے تھے لیکن اس کے باوجود موٹر سائیکل چلانے والے اکثر افراد بغیر ہیلمٹ سفر کرتے نظر آتے ہیں۔ ذرائع کے مطابق گزشتہ دو سالوں میں ہیلمٹ نہ پہننے پر 4,65,652 موٹرسائیکل سواروں کے خلاف چالان کیا جاچکا ہے۔

لاہور میں قانون کی خلاف ورزی کے مرتکب افراد کے خلاف نئی مہم شروع کرنے کا اعلان کرتے ہوئے ٹریفک پولیس کے سربراہ نے کہا کہ مسافروں کی حفاظت میں ہیلمٹ کی اہمیت کو اجاگر کرنے کے لیے متعدد آگہی مہم چلائی جاچکی ہیں اور مستقبل میں بھی ایسی کوششیں جاری رکھی جائیں گی۔ انہوں نے بتایا کہ اب ٹریفک پولیس کی جانب سے ہیلمٹ استعمال نہ کرنے والوں کو 200 روپے کا چالان کیا جائے گا نیز ان کی شناختی دستاویز بشمول رجسٹریشن سرٹیفکیٹ، شناختی کارڈ اور ڈرائیونگ لائسنس ضبط کرلی جائیں گی۔

یہ بھی پڑھیں: لاہور میں جدید ڈرائیونگ سینٹرز بنائے جائیں گے

لاہور ٹریفک پولیس کے سربراہ نے مزید کہا کہ اہم شاہراہوں سے ناجائز تجاوزات ختم کروانے کے لیے بھی اقدامات اٹھائے جائیں گے۔ انہوں نے یقین دہانی کروائی کہ متعلقہ انتظامیہ غیر قانونی دکانوں اور پتھاروں کے خلاف سخت کاروائی کرے گی تاکہ ٹریفک کی روانی بغیر کسی خلل اور بلاتعطل جاری رکھی جاسکے۔

Top