ٹوسان ڈیلیوریز میں تاخیر، ہیونڈائی معاوضہ دینے کیلئے تیار

سوزوکی، ایم جی، پرنس ڈی ایف اسی کے، چنگان اور کِیا کے بعد ہیونڈائی نشاط کی جانب سے بھی صارفین کو ڈلیوریز میں تاخیر کا سامنا کرنا پڑ رہا ہے۔ دیگر آٹو کمپنیز کی طرح ہیونڈائی پاکستان نے بھی سوشل میڈیا پر کی گئی ایک پوسٹ کے ذریعے ہیوںڈائی ٹوسان کی بُکنگ کروانے والے صارفین کو آگاہ کیا ہے کہ عالمی سطح پر سیمی کنڈکٹر چپس کی کمی کی وجہ سے انھیں بھی ڈیلیوریز میں تاخیر کا سامنا ہے۔

یہاں سب سے اچھی بات یہ ہے کہ ہیونڈائی گاڑیاں تاخیر سے ڈیلیور کرنے پر بُکنگ کروانے والوں کو معاوضہ دینے کے لیے تیار ہے اور وہ یہ ہے کہ کوئی بھی صارف ایک مخصوص عرصے کے بعد گاڑی کا کوئی بھی کام کروا سکتا ہے۔

کمپنی کی جانب سے جاری کیے گئے نوٹیفیکیشن میں کہا گیا ہے کہ ہم جانتے ہیں کہ گاڑیوں کی ڈیلیوریز کی تاخیر ایک ناقابل برداشت عمل ہے ۔ لہذا آپ کی جانب سے صبر کا مظاہرہ کرنے پر ہم اپنے صارفین کو یہ آفر دے رہے ہیں کہ وہ 25 ہزار کلومیٹر یا ایک سال کی مدت تک اپنی گاڑی کا مفت کام کروا سکتے ہیں۔

کرونا کے آٹو انڈسٹری پر وار جاری:

جیسا کہ ہم سب جانتے ہیں کہ دنیا بھر کی گاڑیاں بنانے والی کمپنیاں عالمی وبا کووڈ 19 کی وجہ سے شدید متاثر ہوئی ہیں۔ اسی طرح حالیہ وبا نے پاکستانی آٹو انڈسٹری پر بھی گہرے اثرات چھوڑے ہیں۔ وبا کی وجہ سے پیدا ہونے والے عالمی بحران نے کئی آٹو کمپنیز کی ڈلیوریز کو لٹکا دیا ہے۔

پاکستان میں آٹو مینوفیکچرنگ کمپنیاں اپنے صارفین کو گاڑیوں کی ڈیلیوری میں تاخیر کے بارے میں آگاہ رکھنے کیلئے ذمہ دارانہ اقدامات کا مظاہرہ کر رہی ہیں۔

کمپنیز صارفین کی جانب سے صبر کا مظاہرہ کیے جانے پر نہ صرف ان کی تعریف کر رہے ہیں بلکہ ان چیلنجز کو مات دینے کے لیے پوری کوشش کر رہے ہیں۔ ایسے میں انھیں تمام مشکلات کا سامنا کرنے کے لیے صارفین کے تعاون کی ضرورت ہے۔

ہم امید کرتے ہیں کہ جلد آٹوموٹیو انڈسٹری اور مقامی آٹو مینوفیکچررز کے لیے حالات بہتر ہوں گے اور کمپنیز نہ صرف زیادہ گاڑیاں بنائیں گی بلکہ زیادہ بکنگز بھی لیں گی۔