پاکستان کی آٹو موٹیو انڈسٹری میں ایک اہم پیشرفت سامنے آئی ہے جس کے تحت ٹویوٹا انڈس موٹرز اگلے ماہ اپنی پہلی ہائبرڈ الیکٹرک وہیکل (HEV) لانچ کرنے کے لیے تیار ہے۔ یہ اعلان مہینوں کی توقعات کے بعد سامنے آیا ہے، اور انڈس موٹر کمپنی (IMC) کے سی ای او علی جمالی نے ایک حالیہ پریس بریفنگ کے دوران پاکستان میں تیار کردہ کمپنی کی الیکٹرک ہائبرڈ کار کی لانچ کے بارے میں تفصیلات شئیر کیں۔
کمپنی کے سی ای او علی جمالی نے بتایا کہ کمپنی نے مقامی طور پر تیار کردہ HEV کی پیداوار میں 100 ملین ڈالر کی سرمایہ کاری کے بارے انکشاف کیا۔ یہ منصوبہ نہ صرف درآمدی اخراجات کو کم کرنے کے لیے تیار کیا گیا ہے بلکہ اس کے نتیجے میں 37 ملین ڈالر کی سالانہ بچت بھی متوقع ہے، کیونکہ یہ پیداوار 30,000 HEV یونٹس تک پہنچ جائے گی۔
آئندہ ماہ لانچ ہونے والی کار متوقع طور پر کرولا کراس HEV ہے، جو ایک ہائبرڈ کراس اوور ہے جو پاکستانی آٹو انڈسٹری میں گیم چینجر بھی ثابت ہو سکتی ہے۔ ایک طرف جبکہ عوام مہنگائی سے دوچار ہے، کرولا کراس کی غیر معمولی فیول ایوریج اس کا ایک زبردست سیلنگ پوائنٹ ہو سکتا ہے۔
سی بی یو کرولا کراس
کرولا کراس کو ابتدائی طور پر پاکستان میں ایک امپورٹڈ کار کے طور پر لانچ کیا گیا تھا اور پاکستانی سڑکوں پر اس کی موجودگی نے پہلے ہی دلچسپی پیدا کر دی ہے۔ گاڑی میں 1798 سی سی ہائبرڈ انجن دیا گیا ہے جو 168 ہارس پاور اور 305 نیوٹن میٹر ٹارک کے ساتھ ایک طاقتور کارکردگی پیش کرتا ہے۔ اس اپڈیٹ کے موصول ہونے کے بعد اب مقامی طور پر تیار شدہ ویرینٹ کا بے صبری سے انتظار کیا جا رہا ہے جو ہائبرڈ گاڑیوں کی بڑھتی ہوئی مارکیٹ میں ٹویوٹا کی پوزیشن کو مزید مستحکم کرے گا۔
