خیال کیا جارہا تھا کہ ہونڈا ایٹلس ستمبر کے مہینے میں نئی سِوک (Honda Civic 2016) متعارف کروانے کی روایت برقرار رکھتے ہوئے اس بار نئی ہونڈا سِوک 2016 کو بھی ستمبر 2016 ہی میں پیش کیا جائے گا۔ لیکن پھر ایسی خبریں موصول ہونا شروع ہوئیں کہ ہونڈا نے سِوک پیش کرنے کا ارادہ ملتوی کردیا ہے اور اب اسے چند ماہ بعد یعنی 2016 کے آخر یا 2017 کے اوائل میں پیش کیا جائے گا۔ اب تازہ ترین خبروں کے مطابق ہونڈا ایٹلس نے نئی سِوک کو دسمبر 2016 میں فروخت کے لیے پیش کرنے کا فیصلہ کیا ہے۔
نئی سِوک کی آمد میں تاخیر کی بنیادی وجہ ہونڈا HR-V کی آمد بتائی جارہی ہے جو چند ماہ قبل جنوری 2016 میں پیش کی گئی تھی۔ ہوسکتا ہے مقامی کار ساز ادارہ اپنی تمام تر توجہ HR-V ہی پر مرکوز رکھنا چاہتی ہے۔ اس حوالے سے ہونڈا ایٹلس نے تاخیر کی کوئی حتمی وجہ بیان نہیں کی ہے۔
یہ بھی پڑھیں: ہونڈا سِوک R18 انجن کے ساتھ پاکستان میں آسکتی ہے
اس وقت ہونڈا ایٹلس (Honda Atlas) نویں جنریشن کی ہونڈا سِوک پیش کر رہا ہے جس کی فروخت دن بدن کم ہوتی جارہی ہے۔ یہ معاملہ صرف نئی گاڑی تک ہی محدود نہیں بلکہ استعمال شدہ گاڑیوں کی مارکیٹ میں بھی ہونڈا سِوک 2014-15 کی مانگ میں کمی دیکھی جارہی ہے۔ جو افراد چند ماہ قبل نئی یا پرانی سِوک کی تلاش میں نظر آتے تھے انہوں نے بھی خریداری کا ارادہ ملتوی کر کے نئی سِوک 2016 کا انتظار کر رہے ہیں۔ دوسری جانب ٹویوٹا انڈس موٹرز فروخت کے ریکارڈ توڑنے والی کرولا (Corolla) سیڈان میں بھی متعدد خصوصیات شامل کرنے جا رہا ہے۔
فلپائن کو ایشیا پہلا ملک ہونے کا اعزاز حاصل ہے کہ جہاں ہونڈا سِوک 2016 پیش کی جارہی ہے۔ وہاں اسے 1800 سی سی 4-سلینڈر انجن اور 1500 سی سی ٹربوچارجڈ انجن کے ساتھ پیش کیا جارہا ہے۔ پاکستان میں متعارف کروائی جانے والی سِوک (Honda Civic) کے انجن سے متعلق کافی باتیں گردش کر رہی ہے کہ یہاں ٹربو چارجڈ انجن نہیں پیش کیا جائے گا۔ حتمی فیصلہ تو ہونڈا ایٹلس ہی نے کرنا ہے جس کے تمام ہی شائقین منتظر ہیں۔
