ضلعی مجسٹریٹ اسلام آباد کے دفتر نے ایک نوٹیفکیشن جاری کیا ہے جس کے مطابق اتھارٹی نے عوام کو رنگین شیشوں کے استعمال سے روک دیا ہے۔ اتھارٹی نے ڈائریکٹر ایکسائز اینڈ ٹیکسیشن ڈپارٹمنٹ اسلام آباد اور سینئر سپرنٹینڈنٹ پولیس اسلام آباد کو بھی خلاف ورزی کرنے والوں کے خلاف سخت کارروائی کی ہدایت کی ہے۔
نوٹیفکیشن میں کچھ یوں لکھا ہے:
اطلاع ہے کہ موٹر وہیکل آرڈیننس، 1969ء کے تحت رنگین شیشوں کے تمام اجازت نامے فوری طور پر منسوخ کیے جاتے ہیں۔ خلاف ورزی کرنے والوں کے خلاف سخت کارروائی کی جائے گی۔
اتھارٹی نے 28 مئی 2018ء بروز سوموار یہ نوٹیفکیشن جاری کیا۔
گزشتہ سال اگست میں شہر کی ٹریفک پولیس نے راولپنڈی میں رنگین شیشے لگانے والوں کے خلاف ایک مہم شروع کی تھی، سی ٹی او یوسف علی شاہ نے اس وقت کہا تھا کہ شہر میں رنگین شیشوں کی اجازت نہيں دی جائے گی اور اس کی خلاف ورزی کرنے والے گاڑی مالکان کے خلاف سخت کارروائی عمل میں لائی جائے گی۔
مزید برآں، انہوں نے یہ بھی کہا کہ گاڑیاں ضبط کرلی جائیں گی اور مالکان پر بھاری جرمانے لگائے جائیں گے۔
اسلام آباد کے حکام کی جانب سے رنگین شیشوں کے خلاف کارروائی کے علاوہ حکومت پنجاب بھی صوبے بھر میں اپنے شہریوں کی جانب سے فینسی اور یونیورسل نمبر پلیٹوں کے اجراء پر پابندی لگانے کے لیے تیار ہے۔
ہماری طرف سے اتنا ہی، اپنے خیالات نیچے تبصروں میں پیش کیجیے۔
