ٹویوٹا لینڈ کروزر کی موجودہ جنریشن جے ٹو ہنڈرڈ سیریز2007میں متعارف کروائی گئی، یہ پلیٹ فارم اب تقریباًدس سال پراناہو چکا ہے۔جیسا کہ ٹویوٹاکچھ سال پہلے جے ٹو ہنڈرڈ کو ریفریش کر چکی ہے اور یہ اس سیریز کی آخری فیس لفٹ سمجھی جا رہی ہے کیونکہ ٹویوٹا نے اعلان کیا ہے کہ بار ہ ستمبر2018 کے فرینک فرٹ موٹر شو میں ہم نئی ٹویوٹا لینڈکروزر 2018دیکھنے جا رہے ہیں۔اسی حوالے سے ایک ہائبرڈ ورژن کی امید بھی کی جا رہی ہے۔جیسا کہ شو منعقد ہونے میں کچھ ہی دن رہ گئے ہیں لیکن ٹویوٹانے اس نئے شاہکار کے حوالے سے ہمیں تا حال اندھیرے میں رکھا ہوا ہے۔ کمپنی کا دعویٰ ہے کہ وہ اپنے چاہنے والوں اور خریداروں کو نا امید نہیں کریں گے اور یہ نئی ایس یو وِی صحیح معنوں میں ایک لینڈ کروزر ثابت ہو گی۔یہ نئی جنریشن کی لینڈ کروزر اپنی’رف باڈی آن فریم آرکیٹیکچر‘کو جاری رکھے گی۔ یہ ایس یو وِی کھینچنے کی طاقت اور آف روڈ صلاحیتوں سے لیس ہو گی جو کہ اس کی خاص پہچان ہیں۔
ٹویوٹااس نئی لینڈ کروزر کے حوالے سے تاحال کسی بھی قسم کی تفصیلات منظرِ عام پر نہیں لائی سوائے اس ٹیگ لائن کے جو کہتی ہے کہ
نئی لینڈ کروزر آپ کو ہر اس جگہ جہاں آپ چاہیں لے جائے گی، اور واپسی بھی ممکن بنائے گی
موجودہ جنریشن ٹویوٹا لینڈ کروزر پانچ اعشاریہ سات لیٹر کا وِی ایٹ انجن رکھتی ہے جو کہ تین سو اٹھارہ بی ایچ پی اور چار سو ایک ایل بی ایف ٹی ٹارک
دیتاہے۔یہ سب ایس یو وی کوچھ اعشاریہ آٹھ سیکنڈ میں سٹینڈ سٹِل سے سو کلو میٹر فی گھنٹہ تک جانے کے قابل بناتے ہیں۔ نئی لینڈ کروزر سے مزید طاقت لئے وِی ایٹ انجن کو برقرار رکھنے اور بہتر فیول ایفشنسی دینے کی امید کی جا رہی ہے۔امید ہے کہ اس کے انٹیریئر کو بھی اپ گریڈ کیا جائے گا تا کہ ایک لگژری ایس یو وی کی تلاش کرنے والے افراد اس کی جانب متوجہ ہو ں۔
اب ایک ہی سوال جنم لیتا ہے کہ یہ نئی لینڈ کروزر آنے کے بعد ٹویوٹا پاکستان اپنے صارفین کے لئے اس کی قیمت کا تعین کس طرح کریں گے ؟
