دارالحکومت اسلام آباد میں پولیس کی جانب سے لگائے گئے سیمنٹ کے بیریئرز نے مزید قیمتیں جانیں لے لیں۔ گزشتہ دنوں دو نوجوان سلمان اور ارسلان ملک جو بالرتیب بی ایم ڈبلیو S1000rr اور یاماہا R1 پر سوار تھے، سیمنٹ بیریئر سے تصادم ہونے کے باعث جان سے ہاتھ دھو بیٹھے۔ یہ واقعہ جناح ایوینیو (بلیو ایریا) میں پیش آیا۔ ذرائع کے مطابق دونوں نوجوان بیریئرز سے ٹکرانے کے فوراً بعد ہی دم توڑ گئے۔
یہ پہلا موقع نہیں کہ جب موٹر سائیکل سواروں نے اس طرح اپنی جان گنوائی ہو۔ اس سے قبل لاہور سے اسلام آباد آنے والا نوجوان اسلام آباد ہائی وے پر ایک موڑ کاٹتے ہوئے اسی طرز کے بیریئر سے ٹکرا گیا تھا۔ اور اب حالیہ واقعے کے بعد پولیس کی جانب سے لگائے جانے والے بیریئرز پر شدید تنقید کا سلسلہ شروع ہوگیا ہے۔
ڈاؤن لوڈ کریں: پاک ویلز موبائل ایپ
سیمنٹ سے بنائے گئے ان سخت بیریئرز پر کسی بھی قسم کی روشنی یا چمکنے والے ٹیپ نہیں لگائے گئے جس کی وجہ سے موٹر سائیکل اور گاڑیاں چلانے والوں کو ان کی موجودگی کا اندازہ نہیں ہو پاتا۔ ان بیریئرز کا مقصد گاڑیوں کو تیز رفتار سے باز رکھنا ہے تاہم اس کوشش میں قیمتی جانوں کے زیاں کو نظر انداز نہیں کیا جاسکتا۔ اسلام آباد کی کئی شاہراہیں اونچے نیچے راستوں پر مشتمل ہے اور سردی کی آمد سے دھند میں بھی اضافہ ہوچکا ہے، ایسے میں ان رکاوٹوں کی موجودگی بھانپ لینا مزید مشکل ہوگیا ہے۔ لہٰذا سیمنٹ کے ان بیریئرز کو بین الاقوامی معیار کے مطابق بنایا جانا بے حد ضروری ہوگیا ہے۔
برطانیہ جیسے ممالک میں شاہراہوں پر لگائے جانے والے بیریئرز پر چمکنے والا ٹیپ لگایا جانا لازم ہے۔ اس کے علاوہ بیریئرز پر جلنے بجھنے والی روشنیاں بھی لگائی جاتی ہیں تاکہ سفر کرنے والے بالخصوص ڈرائیور صاحبان کو ان کی موجودگی اور فاصلے کا بخوبی اندازہ ہوسکے۔
اس واقعے کے بارے میں موٹر سائیکل اور گاڑیوں کے شوقین افراد سے رائے مانگی گئی جن میں پشاور سے تعلق رکھنے والے یاسر یوسف زئی بھی شامل ہیں۔ اپنے شعبے میں منفرد شہرت رکھنے والے یاسر نے کہا کہ
“محکمہ پولیس کا مقصد لوگوں کو سہولت فراہم کرنا ہے اور انہیں اپنا یہ کام بخوبی کرنا چاہیے۔ سیمنٹ سے بنائے گئے بیریئرز کے بجائے پانی والی رکاوٹوں کو استعمال کیا جانا چاہیے۔ اس خیال کا بنیادی مقصد لوگوں کو برق رفتار سے روکنا ہے ناکہ کسی کو چوٹ پہنچانا۔ دنیا بھر میں پانی والی رکاوٹیں استعمال کی جارہی اور ہماری حکومت کو بھی ایسا ہی کرنا چاہیے۔”
لاہور سے تعلق رکھنے والے میاں انعام بھی پچھلے دس سالوں سے موٹر سائیکل چلا رہے ہیں۔ انہوں نے اس افسوسناک واقعے پر اپنی رائے دیتے ہوئے کہا کہ
“اس خبر کو سن کر مجھے شدید افسوس ہوا۔ پولیس کو ان بیریئرز کے ساتھ انتباہی روشنیوں کا بندوبست کرنا چاہیے تھا۔”
آخر میں، میں صرف اتنا کہنا چاہوں کہ اس واقعہ کے ذمہ دار افراد ہر گز معاف نہیں کرنا چاہیے۔ حکومت کو ان جان لیوا بیریئرز کے خلاف فوری اور سنجیدہ اقدامات کراٹھانا ہوں گے قبل از کہ یہ قاتل بیریئرز مزید انسانوں کو موت کے منہ میں پہنچا دیں۔
اس حوالے سے اسلام آباد ٹریفک پولیس کے موقف کا انتظار ہے اور ان کا جواب موصول ہوتے ہی ہم آپ کو آگاہ کریں گے۔ اس حوالے سے ہمیں بذریعہ تبصرہ اپنی رائے سے ضرور آگاہ کیجیے۔
