مجھے امید ہے کہ پاک ویلز بلاگ کے مستقل قارئین پاکستان میں BMW X1 کی آمد سے متعلق جان ہی چکے ہوں گے۔ لیکن اگر آپ نے ابھی تک اس حوالے سے نہیں پڑھا تو ہم آپ کے لیے یہ خوشخبری دہرائے دیتے ہیں کہ دیوان موٹرز نے گزشتہ ہفتے جرمن کارساز ادارے بی ایم ڈبلیو کی چھوٹی کراس اوور X1 sDrive18i کو پاکستان میں پیش کرنے کا اعلان کردیا ہے۔ پاکستان میں متعارف کروایا جانے والا یہ ماڈل دراصل جرمن ادارے ہی کی ذیلی کمپنی مِنی کی ایک گاڑی Countryman کے پلیٹ فارم پر تیار کیا گیا ہے۔ آئیے اب ہم آپ کو اس گاڑی سے متعلق دس دلچسپ باتیں بیان کرتے ہیں کہ جنہیں پاکستان میں کم ہی لوگ جانتے ہیں:
1: گاڑیاں بنانے والے جرمن ادارے نے X1 کی پہلی جنریشن سال 2009 میں متعارف کروائی جو گزشتہ سال 2015 ت جاری رہی۔ بعد ازاں 2015 ہی کے آغاز میں BMW X1 کی دوسری جنریشن فرنکفرٹ موٹر شو میں پیش کی گئی جسے رواں سال بھارت میں ہونے والی آٹو ایکسپو 2016 میں بھی باضابطہ طور پر پیش کردیا گیا۔
2: بی ایم ڈبلیو X1 کی پہلی جنریشن میں پیش کیے جانے والے تمام sDrive ماڈل پچھلے پہیوں کی قوت (RWD) سے سفر کرنے کی صلاحیت رکھتے تھے جبکہ دوسری جنریشن میں متعارف کروائے جانے والی تمام sDrive ماڈل اگلے پہیوں کی قوت (FWD) سے سفر کرتے ہیں۔
یہ بھی پڑھیں: پاکستان میں نئی BMW X1 متعارف؛ قیمت صرف 40 لاکھ روپے
3: پہلی جنریشن متعارف کروانے کے بعد سال 2014 تک بی ایم ڈبلیو نے دنیا بھر میں 7 لاکھ سے زائد X1 فروخت کیں۔ کار ساز ادارے کی تازہ ترین رپورٹ میں بتایا گیا کہ رواں سال کی ابتدائی ششماہی کے دوران 94,156 بی ایم ڈبلیو X1 تیار اور فروخت کی جاچکی ہیں جو گزشتہ سال جنوری تا جون 2015 کے درمیان بیچی جانے والی گاڑیوں سے 61.7 فیصد زیادہ ہیں۔
4: نئے ڈیزائن اور جدید نظام کے ساتھ BMW X1 نے انشورنس انسٹی ٹیوٹ برائے ہائی وے سیفٹی (IIHS) کے پانچوں امتحانات میں “بہترین” مقام حاصل کیا۔مئی 2016 میں کیے جانے والی اس آزمائش میں X1 کو بہترین حفاظتی کارکردگی کے اعزاز سے بھی نوازا گیا۔
5: پاکستان میں متعارف کروائی جانے والی BMW X1 sDrive18i میں 3-سلینڈر 1499cc ٹربو چارجڈ پیٹرول انجن شامل ہے جو 134 بریک ہارس پاور کے ساتھ 220 نیوٹن میٹر ٹارک بھی فراہم کرسکتا ہے۔
6: پاکستان میں دستیاب BMW X1 کو 6-اسپیڈ مینوئل گیئر باکس کے ساتھ پیش کیا گیا ہے۔ البتہ یوٹیلٹی پیکیج کے ساتھ 6-اسپیڈ آٹومیٹک ٹرانسمیشن 6,44,000 روپے یا پھر 8-اسپیڈ آٹومیمٹک اسٹریپ ٹرانک ٹرانسمیشن بھی 4,61,000 روپے کی اضافی قیمت میں حاصل کیا جاسکتا ہے۔
7: بی ایم ڈبلیو X1 کی لمبائی 4439 ملی میٹر، چوڑائی 1821 ملی میٹر، اونچائی 1598 ملی میٹر جبکہ مجموعی وزن 1540 کلوگرام ہے۔ اس پیمائش کے ساتھ یہ کراس اوورصرف 9.7 سیکنڈ میں 0-100 کلومیٹر فی گھنٹہ کی رفتار حاصل کرسکتی ہے جبکہ اس کی زیادہ سے زیادہ رفتار 200 کلومیٹر فی گھنٹہ تک ہے۔
یہ بھی پڑھیں: پاکستان میں BMW X1 حاصل کرنے کا مکمل طریقہ
8: یورو VI معیارات کے مطابق تیار کیا جانے والے3-سلینڈر انجن کے ساتھ یہ گاڑی ایک لیٹر میں 16 سے 23 کلومیٹر تک سفر کرسکتی ہے۔ یوں یہ دیگر ممالک میں دستیاب 4-سلینڈر انجن والے ماڈل سے کم ایندھن خرچ کرنے کی منفرد خصوصیت کی بھی حامل ہوگئی ہے۔
9: قیمت میں قدرے کم اور حجم میں چھوٹی ہونے کے باوجود BMW X1 کی ڈگی 505 لیٹر پر محیط ہے جسے پچھلی نشستیں بند کر کے 1550 لیٹر تک وسعت دی جاسکتی ہے۔
10: چینی اور جرمن ادارے کی مشترکہ کمپنی بی ایم ڈبلیو بریلیئنس آٹوموٹیو نے گزشتہ ہفتے چینگدوآٹو شو 2016 کے دوران X1 کا پہلا پلگ-ان ہائبرڈ ماڈل متعارف کروایا ہے۔ تاہم یہ ماڈل صرف چینی مارکیٹ کو مدنظر رکھتے ہوئے بنایا گیا ہے لہٰذا مستقبل قریب میں اس کی دیگر ممالک میں دستیابی کا امکان نہیں ہے۔
یہ بھی پڑھیں: چینگدو آٹو شو 2016 میں پیش کی جانے والی 4 بہترین گاڑیاں
اگر آپ بھی BMW X1 کے متعلق کچھ دلچسپ جانتے ہیں تو تبصرے کے ذریعے ہم سے ضرور شیئر کریں!
