ٹویوٹا فورچیونر بمقابلہ ٹویوٹا پراڈو – دو بہترین SUVs کا مختصر جائزہ اور موازنہ!

ٹویوٹا کی پیش کردہ مشہور و معروف گاڑیوں میں ٹویوٹاپراڈو (Prado) اور ٹویوٹا فورچیونر (Fortuner) بھی شامل ہیں۔ یہ دونوں گاڑیاں اوسط-سائز کی SUVs میں شمار کی جاتی ہیں۔ ٹویوٹا فورچیونر کے مقابلے میں ٹویوٹا پراڈو کی تاریخ کئی دہائیوں پرانی ہے۔ ٹویوٹا کی جانب سے پراڈو کو 1984 میں جبکہ فورچیونر کو سال 2005 میں متعارف کروایا گیا تھا۔ یہاں یہ بات بھی قابل ذکر ہے کہ فورچیونر کو ٹویوٹا ہائی لکس کے پلیٹ فارم پر تیار کیا گیا ہے۔

ظاہری انداز (Exterior)

کہتے ہیں کہ خوبصورتی تو دیکھنے والوں کی آنکھ میں ہوتی ہے اس لیےممکن ہے کہ جس گاڑی کو میں انتہائی دلکش قرار دوں وہ کسی اور کو زیادہ پراثر معلوم نہ ہو۔ بہرحال، ان دونوں ہی گاڑیوں کو مارکیٹ میں دسیتاب دیگر SUVs سے بہتر اور خوبصورت قرار دیا جاسکتا ہے۔ ٹویوٹا نے فورچیونر کو اپنی نئی ڈیزائن لینگویج پر تیار کیا ہے جو مستقبل میں لیکسز سمیت دیگر برانڈز کی گاڑیوں کے لیے بھی استعمال یا جائے گا۔ دوسری جانب پراڈو کا اپنا مخصوص انداز ہے جسے ٹویوٹا نے جدت سے ہم آہنگ کرنے کی بھرپور کوشش کی ہے۔ حجم کی بات کریں تو پراڈو کے مقابلے میں فورچیونر قدرے چھوٹی ہے۔ علاوہ ازیں فورچیونر کی گراؤنڈ کلیئرنس بھی پراڈو سے قریباً 20 ملی میٹر کم ہے۔ ان دونوں گاڑیوں کی لمبائی اور چوڑائی کا فرق درج ذیل ہے:

	ٹویوٹا فورچیونر	ٹویوٹا پراڈو
لمبائی	4705 ملی میٹر	4760 ملی میٹر
چوڑائی	1840 ملی میٹر	1885 ملی میٹر

یہ بھی پڑھیں: پاکستان میں نئی ٹویوٹا فورچیونر کی جلد آمد کا امکان

اندرونی حصہ (Interior)

گاڑیاں بنانے والے سرفہرست ادارے ٹویوٹا نے ان دونوں ہی SUVs کے اندر اپنی صلاحیتوں کا بھرپور استعمال کیا ہے۔ گو کہ ٹویوٹا فورچیونر کو ہائی لکس کے پلیٹ فارم ہی پر تیار کیا گیا ہے تاہم ٹویوٹا نے فورچیونر کے اندرونی حصے کو کافی منفرد انداز دیا ہے۔ یہاں موجود سہولیات اور معیار ہر ماڈل میں مختلف اور دوسرے سے منفرد ہیں۔ دوسری جانب ٹویوٹا پراڈو کا اندرونی حصہ اتنا زیادہ متاثر کن تو نہیں البتہ اس میں اضافی گنجائش اور مزید جدید سہولیات شامل کی گئی ہیں۔

یہ بھی پڑھیں: جدید انداز کی حامل نئی ٹویوٹا لینڈ کروزر 2015 – اب پاکستان میں!

نئی ٹویوٹا فورچیونر کی چنیدہ خصوصیات
٭ ایئرکنڈیشننگ (پچھلی نشستوں کے لیے علیحدہ)
٭ کروز کنٹرول
٭ الارم
٭ سات ایئر بیگز
٭ عقبی کیمرہ
٭ اسٹیبلٹی کنٹرول
٭ ٹریکشن کنٹرول
٭ ہل اسٹارٹ اسسٹ کنٹرول
٭ بہتر گرفت کے لیے ASDمع BA اور EBD
٭ سیٹ بیلٹ نہ استعمال کرنے پر انتباہ
٭ پاور ونڈوز + پاور مررز
٭ اسٹیئرنگ کو ترتیب دینے کی سہولت
٭ 80 لیٹر فیول ٹینک
٭ 7 انچ کی آڈیو ڈسپلے
٭ بلو ٹوتھ، USB جیک، AM/FM، CD پلیئر
٭ آواز پہچاننے کی سہولت
٭ اسٹیئرنگ ویل پر آڈیو کنٹرولز
٭ چھ اسپیکرز
٭ خود کار ہیڈ لیمپس

نئی ٹویوٹا پراڈو کی چنیدہ خصوصیات
٭ پانچ / سات نشستوں کی سہولت
٭ سات ایئر بیگز
٭ آڈیو ڈسپلے اور عقبی کیمرہ
٭ ایمرجنسی بریک
٭ اسٹیبلٹی کنٹرول
٭ ٹریکشن کنٹرول
٭ ABS مع EBD اور بریک اسسٹ
٭ ایئر کنڈیشننگ
٭ کروز کنٹرول
٭ اسمارٹ اینٹری اور اسمارٹ اسٹارٹ
٭ 220 والٹ کا ساکٹ
٭ اسٹیئرنگ ویل پر آڈیو اور فون کنٹرولز
٭ دائیں و بائیں جانب آئینوں پر انڈیکیٹرز

نئی ٹویوٹا فورچیونر ماہانہ اقساط پر حاصل کرنے کے لیے یہاں کلک کریں

انجن (Engine)

ٹویوٹا فورچیونر کو 2 پیٹرول اور 3 ڈیزل انجن کے ساتھ 2 ہی ٹرانسمیشن کے ساتھ پیش کیا جاتا ہے۔ تفصیلات درج ذیل ہیں:
1: 2700cc ڈیول VVT-I (پیٹرول)
2: 4000cc ڈیول VVT-I (پیٹرول)
3: 2400cc کامن ریل D-4D (ڈیزل)
4: 2800cc کامن ریل D-4D (ڈیزل)
5: 3000cc کامن ریل D-4D (ڈیزل)

ٹرانسمیشن / گیئر باکس
٭ 6-اسپیڈ مینوئل
٭ 5 / 6-اسپیڈ آٹومیٹک

ٹویوٹا پراڈو بھی 2 پیٹرول اور 3 ڈیزل انجن کے ساتھ پیش کی جاتی ہے البتہ اس میں گیئر باکس کے آپشنز زیادہ ہیں۔ تفصیلات درج ذیل ہیں:
1: 2700cc آئی 4 (پیٹرول)
2: 4000cc وی 6 (پیٹرول)
3: 2800cc آئی 4-ٹی (ڈیزل؛ جون 2015-)
4: 3000cc آئی 4 (ڈیزل)
5: 3000cc آئی 4-ٹی (ڈیزل)
ٹرانسمیشن / گیئر باکس
٭4/5/6 – اسپیڈ آٹومیٹک
٭ 5 / 6 – اسپیڈ مینوئل

گو کہ پاکستان سمیت دنیا کے اکثر ممالک میں ٹویوٹا پراڈو خاصی مشہور ہے تاہم ٹویوٹا فورچیونر نے بھی کئی ممالک میں اپنا لوہا کو منوایا ہے۔ پاکستان میں ٹویوٹا فورچیونر مقامی سطح پر تیار کر کے فروخت کی جاتی ہے جبکہ پراڈو کو مکمل تیار شدہ حالت(CBU) میں درآمد کر کے فروخت کیا جاتا ہے۔

آپ کو ان دونوں SUVs میں سے کونسی گاڑی زیادہ متاثر لگتی ہے؟ ہمیں اپنی قیمتی رائے سے ضرور آگاہ کیجیے۔