برادر اسلامی ملک ترکی کے صدر رجب طیب اردوغان گزشتہ روز پاکستان کے دورے پر پہنچ چکے ہیں۔ ان کے ہمراہ ترکی کے کئی وفاقی وزراء اور اعلی عہدیداران سمیت کاروباری شخصیات کے وفود پاکستان آئے ہیں۔ اطلاعات کے مطابق رجب طیب اردوغان آج (17 نومبر) کو لاہور تشریف لا رہے ہیں۔ دارالحکومت اسلام آباد سے لاہور آمد کا یہ سفر شام 4:30 سے شروع ہوگا۔ ترکی کے صدر 7:30 بجے لاہور کے مشہور مقام شاہی قلعہ پہنچیں گے۔
رجب طیب اردوغان کی لاہور آمد پر اہم شاہراہوں کے بند کیے جانے کا امکان ہے۔ اسی صورتحال کے پیش نظر لاہور ٹریفک پولیس نے عام شہریوں کو بروز جمعرات، 17 نومبر 2016 متبادل راستے اختیار کرنے کا مشورہ دیا ہے۔ جن علاقوں پر عام افراد کی آمد و رفت پر پابندی کی توقع ہے ان میں اقبال پارک، مینار پاکستان، شاہی قلعہ اور حضوری باغ شامل ہیں۔ علاوہ ازیں عزیز بھٹی روڈ (براستہ ہوائے اڈہ)، مال روڈ، لوئر مال روڈ (سیکریٹیریٹ سے شاہی قلعہ تک)، سرکلر روڈ اور ریلوے اسٹیشن کی طرف جانے والے راستے بھی بند کیے جائیں گے۔
یہ بھی پڑھیں: لاہور میں جدید ڈرائیونگ سینٹرز بنائے جائیں گے
ان علاقوں یا شاہراہوں پر سفر کرنے والے افراد کو یہ ہدایات بھی جاری کی گئی ہیں:
– بروز جمعرات 17 نومبر 2016 کو دوپہر 3 بجے سے متبادل راستے اختیار کریں۔
– آزادی فلائی اوور کے ذریعے لاہور میں داخل ہونے والی گاڑیوں کو رنگ روڈ کی طرف موڑ دیا جائے گا۔
– لاری اڈہ اور سبزی منڈی کے ذریعے لاہور سے باہر جانے والی گاڑیوں کو رنگ روڈ کی طرف موڑ دیا جائے گا۔
– شملہ ہل چوک اور ریلوے اسٹیشن سے عظیم اقبال پارک کی جانب رواں ٹریفک کو گڑھی شاہو چوک سے کوآپریٹو اسٹور اور جی ٹی روڈ کا رستہ استعمال کرنا ہوگا۔
– مصری شاہ سے موریا برج کی طرف جانے والے ٹریفک کو اندرونی سرکلر روڈ کی طرف موڑ دیاجائے گا۔
– سگیاں برج ہر قسم کے ٹریفک کے لیے بند رہے گا، یہاں رخ کرنے والی گاڑیوں کو متبادل راستے کی جانب موڑ دیا جائے گا۔
– ویٹنری یونیورسٹی، گورا اسپتال اور ڈی آئی جی آپریشنز سے ضلعی عدالت (ڈسٹرک کورٹس) کی طرف جانے والی ٹریفک کو سندا روڈ کی طرف موڑ دیا جائے گا۔
– ٹرک، بسوں اور دیگر بڑی گاڑیوں (HTV / PSV) کو چوبرجی چوک سے ضلعی عدالت (ڈسٹرک کورڈ) کی طرف جانے کی اجازت نہیں ہوگی۔
– داتا علی ہجویری کے مزار پر حاضری دینے والوں کو عقبی دروازے سے داخل ہونے کی اجازت دی جائے گی۔
