بجلی سے چلنے والی دنیا کی تیز ترین سپر کار پیش کردی گئی
گاڑیاں بنانے والے چینی ادارے نیکسٹ ای وی (NextEV) نے اپنی نئی اور جدید برقی گاڑیوں کی برانڈ پیش کردی ہے۔ 21 نومبر 2016 کو چینی ادارے نے بجلی سے چلنے والی گاڑیوں پر مشتمل برانڈ NIO کی تقریب رونمائی لندن میں انجام دی۔ اس برانڈ کے تحت پیش کی جانے والی EP9 کو دنیا کی تیز ترین برقی سپر کار کے طور پر متعارف کروایا گیا ہے۔
چینی ادارے نیکسٹ ای وی کا دعوی ہے کہ NIO EP9 اب تک پیش کی جانے والی دنیا کی تمام برقی سپر کارز سے کہیں زیادہ تیز ہے۔ جرمنی کے معروف نربورگرینگ ریسنگ ٹریک پر اس کی رفتار جانچی گئی ہے۔ گرین ہیل کے نام سے مشہور یہ ریسنگ ٹریک سپر کارز کو جانچنے کے لیے استعمال کیا جاتا ہے.
چینی کار ساز ادارے نیکسٹ ای وی نے مزید کہا ہے کہ EP9 سپر کار نے 20.8 کلومیٹر کا فاصلہ صرف 7 منٹ اور 5.12 سیکنڈ میں مکمل کرلیا۔ اس طرح فرانس میں سرکٹ پال ریچرڈ میں قائم ہونے والا برقی سپر کار کے ریکارڈ کو 1 منٹ اور 52.78 سیکنڈ کے فرق سے توڑ دیا۔
یہ بھی پڑھیں: برقی گاڑیاں تیار کرنے والے 5 باصلاحیت چینی ادارے
https://www.youtube.com/watch?v=fJD-Ip1meuE&feature=youtu.be
اس برقی سپر کار میں 4 انتہائی برق رفتار موٹر اور 4 گیئر باکسز موجود ہیں۔ یہ موٹر اور گیئر باکس EP9 کو لگ بھگ 1 میگا واٹ قوت فراہم کرتے ہیں جو 1360 ہارس پاور کے مساوی ہے۔ بجلی سے چلنے والی یہ سپرکار صرف 7.1 سیکنڈ میں 0 سے 200 کلومیٹر فی گھنٹہ کی رفتار پکڑسکتی ہے جبکہ اس کی زیادہ سے زیادہ رفتار 314 کلومیٹر فی گھنٹہ کو چھوسکتی ہے۔ اس سپر کار میں شامل بیٹریوں کو گاڑی سے باہر نکال کر بھی چارج کیا جاسکتا ہے۔ 45 منٹ میں چارج ہونے بیٹریز کی مدد سے 427 کلومیٹر تک سفر کیا جاسکتا ہے۔
نیکسٹ ای وی کے بانی و سربراہ ولیم لی نے کہا کہ NIO EP9 ان بہترین گاڑیوں میں سے ایک ہے کہ جنہیں دیکھ کر برقی گاڑیوں کی صلاحیت کا اندازہ لگایا جاسکتا ہے۔انہوں نے امید ظاہر کی کہ جب برقی گاڑیوں سے خریداروں کی ضروریات اور خواہشات پوری ہونے لگیں گی تب کہ ہر شخص بجلی سے چلنے والی گاڑی ہی کو اپنائے گا اور یوں ہم ایک بہتر مستقبل کی جانب قدم بڑھا سکیں گے۔