لیکسز LX570 کا شمار ٹویوٹا لینڈ کروزر کے پرتعیش اور مہنگی ترین ماڈل میں کیا جاتا ہے۔ خود ہمیں جب 2015 ٹویوٹا لینڈ کروزر ZX کا پہلا تجربہ ہوا تو اسے کافی نفیس اور خوبصورت پایا۔ اب دلچسپ خبر یہ ہے کہ شاہانہ گاڑیوں کی سرزمین، جسے دبئی بھی کہا جاتا ہے اور جہاں کے صحراؤں میں کئی بیش قیمت اور نایاب گاڑیاں دفن ہیں، میں لیکسز LX570 کو کنورٹ ایبل انداز میں تخلیق کیا گیا ہے۔
گزرے وقتوں میں 4×4 اور SUVs کو کنورٹ ایبل بنانے کا خیال سامنے آچکا ہے تاہم کار ساز ادارے چند وجوہات کی بنا پر ایسی گاڑیوں کی تیاری میں دلچسپی نہیں رکھتے۔ لیکن دبئی پھر دبئی ہے اور جب بات ہو گاڑیوں کی تو انہوں نے کنورٹ ایبل SUV بنا کر ایک بار پھر اپنی انفرادیت ثابت کردی ہے۔
لیکسز LX570 کنورٹ ایبل میں 5700cc کا V8 پیٹرول (3UR-FE) انجن ہی لگایا گیا ہے جو 362 بریک ہارس پاور اور 530 نیوٹن میٹر ٹارک فراہم کرنے کی سکت رکھتا ہے۔ اس کی قیمت 13 لاکھ درہم رکھی گئی ہے جو 3,70,55,133 پاکستانی روپے کے مساوی ہے۔ گاڑی کی بناوٹ دیکھتے ہوئے یہ قیمت مناسب معلوم ہوتی ہے۔ اور پھر بالکل نئی لیکسز LX570 کے عام ماڈل کی قیمت بھی کچھ تو نہیں ہے!
