کیا سلطان گولڈن نے ریورس کار جمپ کا ریکارڈ توڑ دیا؟

sultan-golden

اگر آپ ہمارے نئے قاری ہیں اور سلطان گولڈن کے بارے میں نہیں جانتے تو آپ کو بتاتے چلیں کہ سلطان محمد خان گاڑیوں اور موٹر سائیکل کے اسٹنٹس دکھانے کی وجہ سے مشہور ہیں۔ انہوں نے 1987ء میں اپنی گاڑی میں سوار ہو کر 249 فٹ پرپھیلی ہوئیں 22 گاڑیوں کے اوپر سے چھلانگ لگا کر عالمی ریکارڈ اپنے نام کیا تھا جس کے بعد وہ پاکستان میں بہت زیادہ مقبول ہوگئے۔

حال ہی میں سلطان گولڈن نے کالام فیسٹیول کے دوران الٹی گاڑی (ریورس کار) سے چھلانگ لگانے کا عالمی ریکارڈ توڑنے کا دعویٰ کیا ہے جو اس وقت ایک امریکی راب ڈائرڈک کے نام ہے۔ راب ایک ٹی وی اسٹار ہیں جو ماضی میں ایم ٹی وی پر ایک رئلیٹی شو بھی کرتے رہے ہیں۔ انہوں نے 13 فروری 2014 کو اپنی شیورلیٹ سونِک کو پچھلی جانب لے جاتے ہوئے 27.21 میٹر (89 فٹ اور 3.25 انچ) طویل چھلانگ لگائی تھی۔ یہ ریکارڈ گینز بک آف ورلڈ ریکارڈز میں شامل ہے۔امریکی شہر کیلی فورنیا میں راب نے صرف چھلانگ ہی نہیں لگائی بلکہ گاڑی کو آرام سے زمین پر بھی اتارا اور خود چلا کر باہر لائے۔ ذیل میں آپ راب کی اس شاندار کارکردگی کا مظاہرہ دیکھ سکتے ہیں۔

گذشتہ دنوں ہمیں مختلف ذرائع سے خبریں موصول ہوئی کہ سلطان گولڈن نے الٹی گاڑی سے 37 میٹر (121 فٹ سے کچھ زیادہ) فاصلے تک چھلانگ لگا ئی ہے۔ بعض لوگ کچھ زیادہ ہی جذباتی ہوگئے اور مشہور کردیا کہ یہ چھلانگ 150فٹ طویل تھی۔ہم نے اس حوالے سے تحقیق کی تو اس کا کوئی واضح ثبوت نہیں مل سکا کہ آیا واقعی ایسا ہوا ہے یا نہیں۔ انٹرنیٹ پر ایک ویڈیو موجود ہے جو ایک نجی ٹی وی چینل نے ریکارڈ کی۔ اس ویڈیو میں سلطان گولڈن کے اس کارنامے پر تبصرہ کرتے ہوئے اسے عالمی ریکارڈ بتایا جا رہا ہے تاہم یہ نہیں بتایا گیا کہ چھلانگ کتنی طویل تھی؟

ہمیں پاکستان میں گاڑیوں کے شعبے میں ہونے والے سرگرمیں پر ہمیشہ خوشی ہوتی ہے اور اگر یہ سب بہتر نظم و ضبط اور میڈیا کی موجودگی میں ہو تو مزید اچھا لگتا ہے۔ لیکن اس طرح کے دعوے کرنا جن کی تصدیق ممکن نہ ہو یا وہ آسانی سے جھٹلائے جاسکیں ہمیں پسند نہیں۔ خاص طور پر ایسی ویڈیو کی موجودگی میں جسے کوئی بھی دیکھ کر دعوے کو جھٹلا سکتا ہے۔

ہم یہاں دونوں ویڈیوز اپنے قارئین کے لیے پیش کر رہے ہیں جسے دیکھ کر وہ خود اندازہ لگا سکتے ہیں کہ سلطان گولڈن کی جانب سے الٹی گاڑی سے طویل چھلانگ لگانے کے ریکارڈ بنانے والی بات میں صداقت ہے یا نہیں۔

ہماری شدید خواہش ہے کہ پاکستان میں تجربکار اسٹنٹ ڈرائیورز اور ریسرز سامنے آئیں اور دنیا بھر میں اپنے ملک کا نام روشن کریں۔ لیکن ساتھ ہی ہم یہ بھی چاہتے ہیں اس بلند و بانگ دعوؤں سے احتیاط برتی جائے جو نہ صرف خود گاڑی کے ڈرائیور بلکہ ملک کی بدنامی کا باعث بنے۔ ہمارا مقصد کسی کی حوصلہ شکنی کرنا نہیں بلکہ ہم چاہتے ہیں کہ وہ اپنی صلاحیتوں کو درست سمت میں بروئے کار لے کر آئیں۔

سلطان گولڈن کی الٹی گاڑی سے لگائی گئی چھلانگ

راب ڈائرڈک کی الٹی گاڑی سے لگائی گئی چھلانگ

  • Alpha Bravo

    he is lying off course.. its obvious

Top