پاکستان میں نئی ٹویوٹا فورچیونر اور ہائی لکس ریوُو پیش کردی گئی

youlou

پاکستان میں ٹویوٹا گاڑیاں تیار اور فروخت کرنے والے ادارے انڈس موٹرز نے نئی ٹویوٹا فورچیونر اور ہائی لکس ریوُو کو باضابطہ طور پر متعارف کروا دیا ہے۔ نئی ٹویوٹا فورچیونر اور ہائی لکس ریوو کی تعارفی تقریب آج (منگل، 6 دسمبر 2016) صبح کو رائل پام گالف اینڈ کنٹری کلب لاہور میں منعقد کی گئی۔ اس تقریب میں ٹویوٹا جاپان اور انڈس موٹرز کے اعلی عہدیداران سمیت ذرائع ابلاغ کے نمائندگان و دیگر افراد نے بھی شرکت کی۔

افتتاحی تقریب کا باقاعدہ آغاز تلاوت کلام پاک سے ہوا جس کے بعد پاکستان کا قومی ترانہ پڑھا گیا۔ اس تقریب سے تین نمایاں شخصیات نے خطاب کیا جن کے نام یہ ہیں:
– جناب ٹی ازوما – نائب چیئرمین انڈس موٹر کمپنی
– جناب علی اصغر جمالی – چیف آپریٹنگ آفیسر، انڈس موٹر کمپنی
– جناب ہیروکی ناکاجیما – چیف انجینئر، ٹویوٹا موٹر کمپنی

اس تقریب کا بنیادی مقصد ٹویوٹا کی دو نئی گاڑیوں کو پاکستان میں پیش کرنا اور حاضرین کو تفصیلات سے آگاہ تھا۔ انڈس موٹر کمپنی کے چیف آپریٹنگ آفیسر علی اصغر جمالی نے خطاب کرتے ہوئے اپنے ادارے کی طویل تاریخ اور کامیابیوں کا ذکر کیا۔ انہوں نے پاکستان میں گاڑیوں کے شعبے میں ہونے والی ترقی پر روشنی ڈالی۔ تقریب کے اختتام پر علی جمالی نے انڈس موٹرز کی مجموعی کارکردگی اور مستقبل کے امکانات پر بھی بات کرتے ہوئے کہا کہ وہ مستقبل میں پاکستان کی معاشی صورتحال اور صارفین دونوں ہی کے لیے مثبت تبدیلیاں دیکھ رہے ہیں۔

ٹویوٹا موٹر کمپنی کے چیف انجینئر ہیروکا ناکاجیما نے گفتگو کے دوران نئی ٹویوٹا فورچیونر اور ہائی لکس ریوُو کے بارے میں بات کی اور ان کی چندہ خصوصیات پر روشنی ڈالی۔ انہوں نے امید ظاہر کی کہ یہ دونوں گاڑیاں پاکستانی صارفین کو اپنی جانب متوجہ کرنے میں کامیاب رہیں گی۔


Top