ہیونڈائی ٹوسان 2020 – ایک ماہر کی نظر سے

0 11 046

کافی انتظار کے بعد اور عوام کی بھرپور ڈیمانڈ پر ہم ہیونڈائی ٹوسان (Hyundai Tucson) کے ایکسپرٹ ریویو کے ساتھ حاضر ہیں۔ کمپنی نے پاکستان میں ٹوسان کے دو ویرینٹس متعارف کروائے، Ultimate اور GLS، لیکن جس گاڑی کا یہاں ریویو کیا جا رہا ہے وہ ٹوسان Ultimate ہے۔

اگر ہم پاکستان میں ہیونڈائی کی تاریخ پر نظر دوڑائیں تو یہ ‏1994-95 میں دیوان مشتاق کے ساتھ پارٹنرشپ کے ذریعے ملک میں آئی تھی۔ شروع میں مقامی صارفین جنوبی کوریا کی گاڑیوں کے حوالے سے کچھ ہچکچاہٹ کا شکار تھے، لیکن سینٹرو اور شہہ زور جیسی گاڑیاں کامیاب ثابت ہوئیں۔ لیکن دیوان کے ساتھ کچھ مسائل ہوئے اور ہیونڈائی نے 2000 کی دہائی میں پاکستان میں اپنا بزنس ختم کر دیا۔

2016 میں پاکستان کی پہلی آٹو پالیسی آنے کے بعد ہیونڈائی نے نشاط موٹرز کو لوکل پارٹنر بنایا اور ایک مرتبہ پھر پاکستان میں انٹری دی۔ ویسے تو لوگوں کو اندیشہ ہے ہیونڈائی اس مرتبہ بھی ٹکے گا یا نہیں، لیکن ہم سمجھتے ہیں کہ اس مرتبہ یہ کمپنی پاکستان میں لمبے عرصےرہنے کے لیے آئی ہے۔ ٹوسان پاکستان میں کنزیومر مارکیٹ کے لیے ہیونڈائی کی پہلی گاڑیوں میں شامل ہے، آئیے بغیر کسی تاخیر کے لیے ریویو کا آغاز کرتے ہیں۔

ٹوسان کا ایکسٹیریئر:

اس گاڑی کا فرنٹ بہت ہی زبردست ہے؛ خاص طور پر کروم میں dipped فرنٹ گرِل اور پیانو بلیک رنگ۔ فوگ لیمپس DRLs کے ساتھ آتے ہیں اور یہ بھی پیانو بلیک رنگ ہی میں ہیں۔ اگر ہم ہیڈلائٹس کو دیکھیں تو ہمیں eyebrow اسٹائل ڈیزائن کے ساتھ LED بلبوں کا ایک سلسلہ نظر آئے گا، جو ہائی اور لو-بِیم دونوں پر کام کرتے ہیں۔ اس کے علاوہ اس میں ایک کارنرنگ لائٹ بھی ہے، جو موڑ پر کافی کام آتی ہے، اور ایسا پہلی بار ہوا ہے کہ یہ ٹیکنالوجی پاکستان میں آئی ہے۔

لائٹس اور فرنٹ گرِل میں موجود cuts اور angles اس کار کو بہت بھاری بھرکم اور جارحانہ انداز دیتے ہیں ۔

headlights

اگر آپ اس گاڑی کو سائیڈ سے دیکھیں تو آپ کو 18 انچ کے بہت خوبصورت الائے رِمز نظر آئیں گے۔ یہ ویلز سلوَر اور ہائپر رنگ میں رنگے ہوئے ہیں اور Kumho ٹائرز رکھتے ہیں۔ یہ ٹائرز جنوبی کوریا کے بنے ہوئے ہیں اور بہترین معیار کے ہیں۔ اس کے علاوہ سائیڈ پر فرنٹ فینڈر سے پیچھے تک ایک impression لائن موجود ہے اور یہ آخر تک بہت نمایاں ہو جاتی ہے۔ اس کے علاوہ یہ کار پلاسٹک aprons رکھتی ہے جو فرنٹ وِیل سے پیچھے کی طرف جاتے ہیں، جو اس گاڑی کو بہت زبردست لُک دیتے ہیں۔

سائیڈ-ویو مررز گاڑی کی رنگت کے ہیں اور LED انڈی کیٹرز رکھتے ہیں، جبکہ ہینڈلز کروم کے ہیں۔ آپ پیانو بلیک رنگ کی رُوف رَیلز بھی دیکھیں گے۔

کار کا پچھلا حصہ بھی شاندار ہے، کیونکہ یہ LED بریک لائٹس رکھتا ہے۔ اس کے علاوہ ہائی ماؤنٹڈ بریک لیمپ کے ساتھ روف اسپائلر بھی ہیں، ساتھ ساتھ پچھلی اسکرین پر وائپر اور ایک شارک فِن انٹینا بھی۔

rear

ٹوسان کی ڈِگی میں گنجائش:

یہ گاڑی ڈِگی میں بہت اچھی گنجائش رکھتی ہے، اور ہمارے خیال میں یہ کِیا اسپورٹیج سے زیادہ ہی ہے۔ آپ اس میں دو بڑے سفری بیگ آسانی سے رکھ سکتے ہیں۔ لیکن اگر آپ ڈِگی میں زیادہ سامان رکھنا چاہتے ہیں تو پچھلی سیٹوں کو فولڈ کرکے سامان رکھنے کی گنجائش بڑھا سکتے ہیں۔

اس کے علاوہ ڈِگی میں بوٹ separator، 12V چارجنگ پورٹ، لائٹ، اسپیئر ویل اور کار کِٹ بھی ہے۔ اس کے علاوہ ٹاپ-آف-دی-لائن ویرینٹ میں آٹوبُوٹ بٹن بھی ہے۔

ٹوسان کا انٹیریئر:

یہ گاڑی اسمارٹ انٹری آپشن رکھتی ہے اور جو چیز آپ سب سے پہلے محسوس کریں گے وہ اس کا نمایاں ہیڈ اور لیگ رُوم ہے۔ دونوں فرنٹ سیٹیں الیکٹرک ہیں جبکہ ڈرائیونگ سیٹ میں لمبر سپورٹ بھی ہے۔ پچھلی سیٹیں گاڑی میں داخل ہونے اور اس سے نکلنے کے حساب سے بہترین ہیں، اور آپ بیک سیٹ کو ایڈجسٹ بھی کر سکتے ہیں۔ لمبے سفر کے لیے پچھلی سیٹوں پر دو بڑے افراداور ایک چھوٹا باآسانی بیٹھ سکتے ہیں۔ پیچھے کی تینوں سیٹوں پر سیفٹی بیلٹس کے ساتھ ساتھ چائلڈ سیفٹی سِیٹ اینکرز بھی ہیں۔ یہ سیٹیں بہت آرام دہ ہیں اور اعلیٰ معیار کا چمڑا رکھتی ہیں۔

interior

اگر آپ گاڑی کا انٹیریئر دیکھیں تو یہ کہا جا سکتا ہے کہ اس کا انٹیریئر اور ایکسٹیریئر ایک دوسرے کو مکمل کرتے ہیں۔ کِیا اسپورٹیج کے معاملے میں انٹیریئر ایکسٹیریئر سے ایک جنریشن پرانا لگتا ہے۔

ٹوسان کا انٹیریئر بہت ماڈرن ہے جس میں curves اور چمڑے کا سِلا ہوا ڈیش بورڈ ہے۔ ڈیش بورڈ کا اوپر والا حصہ ذرا کم معیار کے پلاسٹک سے بنا ہوا ہے، جبکہ نچلا حصہ بہترین ہے۔ اس کے علاوہ تمام AC وینٹس سلوَر بارڈر کے ہیں۔

ایکسٹیریئر کی طرح انٹیریئر بھی پیانو بلیک اور سلوَر رنگ کا خوبصورت کنٹراسٹ رکھتا ہے۔

اسٹیئرنگ ویل اور اسپیڈومیٹر:

اس کار کا اسٹیئرنگ وِیل ایڈجسٹ ایبل ہے اور آپ اسے اپنی پسند اور اسٹائل کے حساب سے سَیٹ کر سکتے ہیں۔ کمپنی نے اسٹیئرنگ کے ساتھ ہی پُش اسٹارٹ بٹن لگایا ہے۔ پُش اسٹارٹ کرنے کے بعد اس کی اسپیڈومیٹر اسکرین آن ہو جاتی ہے۔

اس کی اسکرین کا سائز اسپورٹیج سے بڑا ہے، جس پر تمام ضروری معلومات دکھائی دیتی ہیں، جن میں فیول ایوریج، طے کیا گیا فاصلہ، سفر کا دورانیہ، فوری فیول اکانمی اور ڈجیٹل اسپیڈو میٹر شامل ہیں۔

اس کے علاوہ آپ اسکرین پر ایک ٹچ کے ذریعے انٹیریئر لائٹ سَیٹ کر سکتے ہیں۔

اسٹیئرنگ کنٹرولز میں کروز کنٹرول بھی شامل ہے، جو بڑے کام کی چیز ہے کیونکہ اسے آپ گاڑی کو مستقل اپنی طے کی گئی رفتار پر چلاسکتے ہیں۔ اسٹیئرنگ ویل کے بائیں جانب فون کال کے بٹن ہیں۔ اس کے علاوہ آپ اسٹیئرنگ ویل سے انفوٹینمنٹ اسکرین کو بھی کنٹرول کر سکتے ہیں۔

انفوٹینمنٹ سسٹم:

کمپنی نے 10.1 انچ کی انفوٹینمنٹ اسکرین لگائی ہے، جس کی ہیونڈائی پاکستان میں خوب تشہیر کر رہا ہے۔ ہماری نظر میں اسکرین ڈرائیونگ میں رکاوٹ سی لگتی ہے، بہرحال کمپنی نے اسے مارکیٹ سروے کے بعد ہی لگایا ہوگا۔ اسکرین بہترین فون کنیکٹیوِٹی، اینڈرائیڈ یونٹ اور نیوی گیشن میپس رکھتی ہے۔

ایک چیز جو ہمیں اسکرین پر پسند نہیں آئی وہ وڈیو آپشن ہے، جو ڈرائیونگ کے حساب سے ایک خطرناک فیچر ہے۔

infotainment system

ٹوسان کا آڈیو سسٹم:

یہ کار فرنٹ کے اور پچھلے دونوں دروازوں میں اسپیکرز رکھتی ہے، جبکہ اس کی ساؤنڈ کوالٹی بھی بہت اچھی ہے۔

اے سی کی پرفارمنس:

ٹوسان ڈوئل ڈجیٹل کلائمٹ کنٹرول سسٹم رکھتی ہے، اور اس کی کارکردگی زبردست ہے، چاہے شدید گرمی ہی کیوں نہ ہو۔ اس میں پچھلی سیٹوں کے لیے علیحدہ وینٹس بھی ہیں۔

آپ ڈیش بورڈ میں موجود کُول باکس میں اپنی کھانے پینے کی چیزیں بھی ٹھنڈی رکھ سکتے ہیں۔

ٹوسان کا سینٹرل کونسول:

سینٹرل کونسول 12V چارجر، AUX، USB اور سگریٹ لائٹر رکھتا ہے۔ اس کے نیچے آپ کو 6-اسپیڈ ٹپ ٹرونک ٹرانسمیشن کا گیئر نوب ملے گا۔ الیکٹرک پارکنگ، آٹو ہولڈ اور ڈاؤن ہِل اسسٹ کے بٹن بھی موجود ہیں۔

آپ کو ڈرائیو موڈ کا بٹن بھی ملے گا، جس کے ذریعے آپ ایکو، کمفرٹ اور اسپورٹ موڈ میں سے کسی کا انتخاب کر سکتے ہیں۔ اس میں ایک کپ ہولڈر بھی ہے۔

وائرلیس چارجر:

سینٹرل کونسول کا بہترین آپشن ہے وائرلیس چارجنگ پوائنٹ، جہاں آپ اپنا موبائل بغیر کسی وائر یا پریشانی کے چارج کر سکتے ہیں۔ اگر آپ اپنا موبائل گاڑی میں بھول جائیں، تو ڈجیٹل ڈسپلے آپ کو اس کی یاددہانی کروائے گا۔

ڈیش بورڈ کے بٹن:

ڈیش بورڈ کے دائیں یعنی سیدھے ہاتھ کی جانب آپ کو مختلف بٹن ملیں گے، جن میں اسپیڈزمیٹر کی لو/ہائی LED، ٹریکشن کنٹرول اور آٹو بوٹ شامل ہیں۔ اس کے علاوہ اس میں ایک لاک بٹن بھی ہے جس کے ذریعے آپ ریت یا کیچڑ میں پھنسی اپنی گاڑی کو نکال سکتے ہیں۔

انٹیریئر کی چھوٹی لیکن اہم باریکیاں:

ایک باریکی جو کمپنی نے شامل کی ہے وہ آئینہ رکھنے والے سن وائزر کے ساتھ ڈرائیور اور مسافر دونوں سیٹوں پر لائٹ دینا ہے۔ آپ وائزر کو کھول کر خود کو براہ راست دھوپ سے بچا سکتے ہیں۔ اس کے علاوہ آپ ہیڈ ریسٹ کو اپنی پسند اور آرام کے مطابق تین مختلف پوزیشنوں میں رکھ سکتے ہیں۔

روف کونسول کے بیچ میں کمپنی نے سن گلاسز ہولڈر اور پینورامک سن رُوف کا کنٹرول دیا ہے۔ سن رُوف پاکستان میں اس کار کا سب سے زیادہ مشتہر کیا جانے والا فیچر ہے۔ ہیونڈائی نے سن رُوف میں ایک سیفٹی نیٹ بھی انسٹال کی ہے تاکہ آپ کو ڈرائیو کے دوران کنکروں وغیرہ سے بچایا جاسکے۔

Tucson sunroof

ریئر-وِیو مِرر:

ریئر-وِیو مِرر میں آٹومیٹک ڈِمنگ فیچر کے ساتھ ساتھ ایک کمپاس یعنی قطب نما بھی ہے۔ یہ کمپاس زیادہ سفر کرنے والے افراد کے لیے بہت مددگار ہے۔

ٹوسان کا کِیا اسپورٹیج کے ساتھ مقابلہ:

جیسا کہ ہم نے پہلے کہا کہ ٹوسان اسپورٹیج سے زیادہ جدید اور فیشن ایبل لگتی ہے۔ دونوں گاڑیوں کے انفوٹینمنٹ سسٹمز میں ایپل کار پلے اور اینڈرائیڈ ہے، لیکن ٹوسان نیوی گیشن سسٹم کے ساتھ آتی ہے۔

ٹوسان کُول باکس، کمپاس اور وائرلیس چارجرجیسے کچھ اضافی فیچرز کے ساتھ آتی ہے۔ اس کے علاوہ کِیا اسپورٹیج میں پارکنگ اور رَین سینسرز ہیں، جو ٹوسان میں نہیں ہیں۔

ڈرائیو کا تجربہ:

ریورس کیمرے کی وڈیو کوالٹی ذرا کم ہے کہ جس کے پکسل ٹوٹ جاتے ہیں۔ جیسا کہ پہلے بتایا گیا کہ اس میں تین ڈرائیو موڈز؛ البتہ ہم نے اسے زیادہ تر کمفرٹ موڈ میں چلایا۔ سب سے پہلے اس کا پاور اسٹیئرنگ ہے جو اتنا زبردست ہے کہ آپ صرف ایک انگلی سے بھی اسے کنٹرول کر سکتے ہیں۔

کار کی کُشننگ اور سیٹ postures زبردست ہیں، اور آپ اس کار کو لمبے سفر پر لے جا سکتے ہیں۔ اس کے علاوہ گاڑی بغیر کسی رکاوٹ کے بہت صاف وِیو دیتی ہے۔

اس کے علاوہ اس کا terrain، انجن، سسپنشن، گیئر ٹرانسمیشن 100 فیصد اسپورٹیج جیسے ہیں۔ اس لیے دونوں گاڑیاں ڈرائیونگ تجربے کے لحاظ سے ایک جیسی ہی ہیں۔

ٹوسان کا انجن اور پِک:

جیسا کہ ہم نے آپ کو پہلے بتایا کہ ٹوسان 2000cc انجن رکھتی ہے، بالکل کِیا اسپورٹیج کی طرح، اور اس کا پِک بہترین ہے خاص طور پر شہر کے اندر ڈرائیونگ کے لیے۔ اگر آپ سوِک یا کرولا سے اس گاڑی پر منتقل ہوں تو آپ کو یہ گاڑی ہرگز کم پاور کی نہیں لگے گی۔

البتہ اگر آپ گاڑی پر زیادہ طاقت آزمانا چاہتے ہیں تو زیادہ سے زیادہ آؤٹ پُٹ حاصل کرنے کے لیے اسپورٹ موڈ پر منتقل ہو جائیں۔

ٹوسان کی ہینڈلنگ:

ہم نے اس گاڑی کو صحرا میں، شہروں کے درمیان اور ہائی وے پر چلایا ہے اور ہمارے خیال میں اس کی ہینڈلنگ زبردست ہے۔ آپ کو یہ گاڑی کسی بھی موقع پر unstable نہیں لگے گی اور اس میں اس کا ٹریکشن اہم کردار ادا کرتا ہے۔ ٹریکشن کنٹرول گاڑیکی stability اور فیول ایوریج کے لیے بہترین ہے۔

ٹوسان کا فیول ایوریج:

یہ 4-وِیل ویرینٹ شہر کے اندر 8 سے 9 کلومیٹرز فی لیٹر دیتا ہے، جبکہ لمبے روٹ پر یہ AC کے ساتھ 11 سے12 کلومیٹرز فی لیٹر دیتی ہے۔ اس کے علاوہ اس کے 2-ویل ڈرائیو کا فیول ایوریج شہر کے اندر 9 سے 10 کلومیٹرز فی لیٹر جبکہ لمبے روٹ پر 12 سے 13 کلومیٹرز فی لیٹر ہے۔

سسپنشن اور گراؤنڈ کلیئرنس:

اس کا سسپنشن بہت ہموار ہے اور گڑھوں وغیرہ میں خوب کام کرتا ہے، لیکن آپ اس گاڑی کو extreme آف-روڈنگ کے لیے استعمال نہیں کر سکتے کیونکہ یہ ہونڈا یا ٹویوٹا کی سیڈان گاڑیوں سے بس چند ملی میٹر ہی اونچی ہے۔ اس کے علاوہ اس کی گراؤنڈ کلیئرنس مقامی سڑکوں اور اسپیڈبریکرز پر بہترین ہے۔

ٹوسان کے بریکس:

کمپنی اس سے بہتر بریکس بنا سکتی تھی، کیونکہ آپ کو ایمرجنسی کی صورت میں بریک پیڈل پر زور سے دبانا پڑتا ہے۔

سیفٹی:

گاڑی ڈوئل ایئربیگز اور ABS کےساتھ آتی ہے، جو اسے ذرا محفوظ گاڑی بناتی ہے۔

ساؤنڈ پروفنگ:

گاڑی کی ساؤنڈ پروفنگ بہترین ہے، سڑک یا انجن کا شور کیبن کے اندر نہیں آتا۔

2-وِیل بمقابلہ 4-وِیل؟

اگر آپ گاڑی کو شہر کے اندر چلانا چاہتے ہیں تو 2-وِیل ڈرائیو آپ کے لیے پرفیکٹ ہے، لیکن اگر آپ پہاڑی علاقوں میں سفر پر جا رہے ہیں یا ہلکی پھلکی آف-روڈنگ کر رہے ہیں تو آپ کو 4-وِیل ٹوسان خریدنی چاہیے۔

ہمیں ایک مرتبہ پھر یاد دلاتے چلیں کہ یہ گاڑی extreme آف-روڈنگ کے لیے نہیں ہے۔ ہم نے اسے صحرائے تھل میں چلایا، اور اس کی پرفارمنس اس علاقے کے حساب سے بہترین تھی۔

0 سے 100 کلومیٹرز فی گھنٹہ:

یہ گاڑی11.35 سیکنڈز میں 0 سے 100 کلومیٹرز فی گھنٹہ تک پہنچتی ہے۔

ری سَیل کا پہلو:

پارٹس کی دستیابی اور قیمت اس گاڑی کے مستقبل اور ری سَیل ویلیو کا تعین کرے گی۔ ہمارے خیال میں اس کے پرزوں کی قیمتیں نسبتاً زیادہ ہوں گی، جو اس گاڑی پر منفی اثر ڈالیں گی۔

وڈیو دیکھیں:

Google App Store App Store

جواب چھوڑیں

آپ کا ای میل ایڈریس شائع نہیں کیا جائے گا.