ہیونڈائی سوناٹا کب لانچ ہوگی؟ تاریخ کا اعلان کردیا گیا

رواں ماہ ہیونڈائی کی جانب سے ایک پرائیویٹ ایونٹ میں ہیونڈائی سوناٹا کو سامنے لایا گیا ہے۔ لیک ہونے والی تصاویر اور دیگر معلومات سے یہ انکشاف ہوا ہے کہ کمپنی سوناٹا کے دو ویرنٹسن لانچ کرے گی جو 2000 اور 2500 سی سی انجن پر مشتمل ہو گی۔

ذرائع کے مطابق یہ ڈی سیگمنٹ کار آئندہ ماہ 5 جولائی 2021 کو لانچ کی جائے گی یعنی اس گاڑی کی لانچ کو ایک ہفتہ باقی ہے۔ رپورٹس کے مطابق ہیونڈائی سوناٹا کو ہنڈا اکارڈ اور ٹویوٹا کیمرے کے مقابلے میں مارکیٹ میں اتار رہی ہے جو کہ اپنے مد مقابل گاڑیوں کی نسبت کافی سستی ہوگی۔ رپورٹس کے مطابق سوناٹا کی قیمت 80 سے 85 لاکھ کے درمیان ہوگی۔ اگر ہیونڈائی سوناٹا کی یہی قیمت رکھتی ہے تو یہ گاڑی بہترین سیلر کے طور پر سامنے آسکتی ہے۔ ہم آپ کو اس سے قبل بھی بتا چکے ہیں کہ ہیونڈائی پاکستان میں سوناٹا کی 456 CKD کٹس بھی در آمد کر چکی ہے۔

دونوں ویرینٹس میں کیا فرق ہے؟

2500 سی سی انجن کے ساتھ آنے والے ویرینٹ میں تین اضافی فیچرز دئیے گئے ہیں جو مندرجہ ذیل ہیں۔

• پیچھے کا آٹو میٹک شیڈ
• ہیڈ اَپ ڈسپلے
• 6 ائیر بیگز

اس کے علاوہ دونوں ویرینٹس میں تمام فیچرز ایک جیسے ہیں۔ ذرائع کے مطابق 2000 سی سی انجن کیساتھ آنے والی گاڑی میں دو ائیر بیگز موجود ہوں گے۔

انجن اور ٹرانسمشن

2500 سی سی انجن 191 ہارس پاور کیساتھ 245Nm ٹارک پیدا کرتا ہے اور یہ فیچر اس گاڑی کو طاقتور سیڈان بنانےکیلئے کافی ہے۔ دوسری جانب 2000 سی سی انجن 152 ہارس پاور کے ساتھ 192Nm ٹارک پیدا کرتا ہے۔ اس کے علاوہ دونوں گاڑیاں فارورڈ وہیل ڈرائیو ہونے کیساتھ ساتھ 6 سپیڈ ٹرانسمیشن اور تین ڈرائیونگ موڈز رکھتی ہیں۔

پیمائش

گاڑی کی لمبائی 4900 ملی میٹر، چوڑائی 1860 ملی میٹر اور اونچائی 1445ملی میٹر ہے۔ یہ ایک کافی کھلی گاڑی ہے جس میں آپ اور آپ کی فیملی بآسانی سفر کر سکتے ہیں۔

ایکسٹیرئیر

گاڑی کے ایکسٹیرئیر کی بات کی جائے تو اس کا سب سے پہلا قابل غور فیچر 18 انچ کا الائےوہیل ہے۔ اس کے علاوہ اس گاڑی میں دو LED پروجیکشن ٹائپ ہیڈلائٹس، DRLs اور پینورامک سن روف جیسے فیچرز دئیے گئے ہیں۔ یہ گاڑی دیکھنے میں کافی پریمیم اور ایگزیکٹیو نظر آتی ہے جو مارکیٹ میں آنے والی دیگر سیڈانز کو ٹف ٹائم دینے کیلئے کافی ہے۔

انٹیرئیر

انٹیرئیر کی بات کی جائے تو کمپنی متوقع طور پر 8 انچ کا انفوٹینمنٹ انٹرٹینمنٹ یونٹ دے گی۔ اس کے ساتھ گاڑی میں وائرلیس چارجر، پش سٹارٹ بٹن جیسے فیچر دیکھنے کو مل سکتے ہیں۔ اسی طرح سیٹس ناپا لیدر کی بنی ہوں گی جبکہ ڈرائیور اور پیسنجر سیٹس پاورڈ ہوں گی۔ اے سی کی بات کی جائے تو ہیونڈائی سوناٹا میں ڈوول زون آٹو کلائمیٹ کنٹرول سسٹم دیا جائے گا۔

سیفٹی

2000 سی سی گاڑی میں دئیے گئے سیفٹی فیچرز میں دو ائیر بیگز، فرنٹ اور رئیر پارکنگ سینسرز، رئیر کیمرہ، سمارٹ کروز کنٹرول اور ڈائنامک گائیڈلائن جیسے فیچرز متعارف کروائے گئے ہیں جو کہ اس گاڑی کو آپ اور آپ کی قیملی کیلئے کافی محفوظ بناتے ہیں۔ ہم امید کرتے ہیں کہ ہیوںڈائی نشاط اس گاڑی میں مزید سیفٹی فیچرز آفر کرے گی۔