آج ہم آپ کے لیے سوزوکی GSX-R150 کا ایک ماہر کی نظر سے جائزہ لے کر حاضر ہوئے ہیں کہ جسے سوزوکی Gixxer 150 SF بھی کہا جاتا ہے۔ کمپنی اس موٹر سائیکل کو موٹو GP ایڈیشن قرار دیتی ہے کیونکہ یہ مکمل اسپورٹس صورت میں ہے۔ پاکستان میں دوسری 150cc موٹر سائیکلیں naked باڈی شکل میں ہیں، جبکہ Gixxer پہلی موٹر سائیکل ہے جو اس کیٹیگری میں مکمل باڈی فیئرنگ کے ساتھ آتی ہے۔ اس کے علاوہ اس کی صورت سوزوکی کی دوسری Gixxer موٹر سائیکلوں سے بھی ملتی جلتی ہے۔
موٹر سائیکل کی فیئرنگ اور باڈی پارٹس کا معیار بہت اچھا ہے، جس کی آپ ایک جاپانی مینوفیکچرر سے توقع رکھ سکتے ہیں۔
رنگ:
یہ موٹر سائیکل تین رنگوں میں آتی ہے: کالا، لال اور نیلا۔ اس موٹر سائیکل کی پینٹ کوالٹی بہت عمدہ ہے۔ رنگوں کے شیڈز بھی بہت خوبصورت لگتے ہیں۔
بریکس اور ویلز:
یہ موٹر سائیکل اگلے اور پچھلے ٹائروں میں ڈسک بریکس رکھتی ہے، جو اسے روکنے کی زبردست طاقت کے حامل ہیں۔ کمپنی نے فرنٹ اور ریئر میں 17-انچ الائے ویلز لگا رکھے ہیں۔ فرنٹ ٹائر کا سائز 100/80 ہے جبکہ پچھلا ٹائر 140/60 ہے، جبکہ دونوں ٹائرز ٹیوب لیس ہیں اور بہترین روڈ گرپ رکھتے ہیں۔
سسپنشن:
فرنٹ پر اس موٹر سائیکل میں سادہ انورٹِڈ فورک جبکہ ریئر پر آپ کو مونو شاک سسپنشن ملے گا۔ مونو شاک 7-وے ایڈجسٹ ایبل ہے، یعنی آپ اس کو اپنی پسند کے مطابق نرم یا سخت کر سکتے ہیں۔
گیئر ٹرانسمیشن:
یہ موٹر سائیکل 5-اسپیڈ گیئر ٹرانسمیشن رکھتی ہے، جس میں پہلا گیئر آگے کی طرف اور باقی چار پیچھے کرنے پر آتے ہیں۔
فیول ایوریج:
یہ موٹر سائیکل 50 کلومیٹرز فی لیٹر کا فیول ایوریج اور ساتھ ہی 12 لیٹر کا فیول ٹینک رکھتی ہے۔
انجن:
موٹر سائیکل 155cc سنگل سلنڈر ایئر کوُلڈ انجن رکھتی ہے جو اسے اچھی طاقت اور فیول ایوریج دیتا ہے۔ اس کے علاوہ ایگزاسٹ سسٹم کیٹالٹک کنورٹر کے ساتھ آتا ہے اور اس کے مفلر کا ڈیزائن بہت خوبصورت ہے۔
سوئچز:
موٹر سائیکل ہینڈل کے دائیں جانب پُش اسٹارٹ، انجن کِل، پارکنگ لائٹ اور مین ہیڈ لائٹ کے سوئچز رکھتی ہے۔ اس کے علاوہ بائیں جانب آپ کو ڈِپر، ہیڈ لائٹ ہائی/لو بیم، انڈی کیٹر اور ہارن سوئچز ہیں۔
انفارمیشن کلسٹر:
انفارمیشن کلسٹر ایک ڈجیٹل RPM میٹر، ڈجیٹل اسپیڈومیٹر، گیئر انڈی کیشن، فیول گیج، گھڑی اور ٹرپ انفارمیشن رکھتا ہے۔ اس کے علاوہ اس میں RPM لائٹ ہے جو چھ RPM کے بعد آن ہو جاتی ہے۔
ٹاپ اسپیڈ:
ہمارے ٹیسٹ کے مطابق موٹر سائیکل کی ٹاپ اسپیڈ 105 سے 110 کلومیٹرز فی گھنٹہ ہے۔
قیمت اور کیا یہ جائز ہے؟
موٹر سائیکل کی موجودہ قیمت 6 لاکھ روپے ہے، لیکن سوال یہ ہے کہ کیا یہ جائز قیمت ہے؟ عام طور پر اتنی زیادہ قیمت کے ساتھ آپ بہت طاقتور اور اچھی کارکردگی والی موٹر سائیکل کی توقع رکھتے ہیں لیکن یہ سادہ 150cc کا انجن رکھتی ہے، جو آپ کو پاکستان میں دوسری کئی موٹر سائیکلوں میں مل جائے گا۔ اس لیے ہم سمجھتے ہیں کہ یہ اس موٹر سائیکل کی درست قیمت نہیں ہے۔
وڈیو دیکھیں:
