جیپ ریسنگ کے شائقین کے لیے خوشی کی خبر ہے کہ پنجاب ٹورازم ڈیولپمنٹ کارپوریشن (TDCP) نے اگلی تھل ڈیزرٹ ریلی کی تاریخوں کا اعلان کر دیا ہے۔ تفصیلات کے مطابق یہ ریس 7 نومبر سے 10 نومبر 2024 تک ضلع مظفرگڑھ، کوٹ ادو اور لیہ میں منعقد ہوگی۔ اس میں کئی کیٹیگریز شامل ہوں گی جیسا کہ پریپئرڈ، سٹاک، ویمن، ویٹرن، ڈرٹ بائیک اور کوآڈ بائیک وغیرہ۔
تھل ڈیزرٹ ریلی کا شیڈول
ٹی ڈی سی پی کے مطابق تین روزہ ڈیزرٹ ریلی کا شیڈول کچھ یوں ہے:
- 7 نومبر کو کوٹ ادو کے علاقے چنگا مانگا ٹیلہ میں رجسٹریشن، ٹیگنگ، تکنیکی معائنہ اور میڈیکل چیک اپ ہوگا۔ اس کے علاوہ، اسی دن ڈی ایچ اے ملتان میں ڈرائیور نیویگیٹر کانفرنس اور ڈراز کا انعقاد بھی ہوگا۔
- 8 نومبر کو چھانگا مانگا ٹیلہ، کوٹ ادو میں ڈراز اور شاہ سواری کی بنیاد پر کوالیفائنگ راؤنڈز ہوں گے۔ دن کا اختتام جھومر، ٹینٹ پیگنگ، اور کبڈی کے مقابلوں کے ساتھ کیا جائے گا۔
- 9 نومبر کو سٹاک کیٹیگری ریس، ٹینٹ پیگنگ، کبڈی، اور چوبارہ ضلع لیہ میں آتش بازی کے ساتھ ثقافتی رات کا اہتمام ہوگا۔
10 نومبر کو کئی ریسیں ہوں گی جن میں پریپیئرڈ، ویمن کیٹیگری، ڈرٹ بائیک، اور کوآڈ بائیک شامل ہیں۔ دن کا اختتام ثقافتی رات اور انعامات کی تقسیم کی تقریب کے ساتھ ہوگا۔
تھل ڈیزرٹ ریلی
پاکستان میں گزشتہ چند سالوں سے ڈیزرٹ جیپ ریلی کو بے حد مقبولیت حاصل ہو رہی ہے۔ مقامی اور بین الاقوامی سرکٹس سے نئے نام اور ڈرائیورز ان ایونٹس میں بھرپور شرکت کر رہے ہیں۔ چولستان ریلی سے شہرت پانے والا یہ کھیل ملک میں ایک لمبے سفر سے گزر چکا ہے اور تھل جیپ ریلی اس کھیل کو موجودہ مقام تک پہنچانے والے اہم ایونٹس میں سے ایک ہے۔
