ٹویوٹا پریوس کی ممکنہ حریف ہیونڈائی آئیونِک کی تصویری جھلکیاں

0 122

کئی دنوں سے ایسی خبریں گردش کر رہی تھیں کہ ہیونڈائی روایتی حریف ٹویوٹا کی مشہور ہائبرڈ برانڈ پریوس کے مقابلے میں ایک نئی گاڑی پیش کر رہا ہے۔ اس حوالے سے گزشتہ دنوں ٹویوٹا پریوس کو ٹکر دینے والی ہیونڈائی آئیونِک کی کچھ تخیلاتی تصاویر بھی پیش کی گئی تھیں۔ اب تازہ ترین خبر یہ ہے کہ ہیونڈائی کی اس گاڑی کو شائقین نے ایک تصویری شوٹنگ کے دوران دیکھ لیا ہے اور اس گاڑی کی حقیق تصاویر بھی سامنے آ گئیں ہیں۔ دلچسپ بات یہ ہے کہ ہیونڈائی نے عام طریقہ کار کے برعکس اس گاڑی کو ڈھانپنے یا چھپانے کی کوشش ہی نہیں کی۔

کوریا سے تعلق رکھنے والے نامور ادارے ہیونڈائی کی آئیونِک چار نشستوںوالی گاڑی ہے جسے جاپانی ٹویوٹا پریوس اور امریکی شیورلیٹ وولٹ سے مسابقت کے لیے پیش کیا جا رہا ہے۔ ہیونڈائی نے اعلان کیا ہے کہ وہ اس گاڑی کے تین مختلف صورتوں میں پیش کرے گا جن میں عام ہائبرڈ، پلگ-ان ہائبرڈ اور مکمل برقی گاڑی شامل ہیں۔ مکمل طور پر بجلی سے چلنے والی آئیونِک کا حقیقی مقابلہ نسان لیف سے ہوگا۔

یہ بھی پڑھیں: ٹویوٹا اور ہونڈا کی ہائبرڈ گاڑیوں میں کیا چیز مختلف ہے؟ آئیے جانتے ہیں!

امریکی شیورلیٹ وولٹ 1500 سی سی انٹرنل کمبسشن انجن کے ساتھ آتی ہے جبکہ نئی پریوس میں 1800 سی سی انجن لگایا گیا ہے۔ ہیونڈائی نے ان دونوں کو ٹکر دینے کے لیے درمیانہ رستہ نکالا ہے اور اب وہ آئیونِک کو 1600 سی سی انجن کے ساتھ پیش کرے گا۔

اگر ہیونڈائی آئیونِک کے انداز کی بات کریں تو یہ ٹویوٹا پریوس سے کافی ملتا جلتا ہے۔ خصوصاً اس کا پچھلا حصہ تو اپنی مسابقتی گاڑی سے کافی میل کھاتا ہے جس میں نہ صرف بیٹریز بلکہ دیگر سامان بھی باآسانی سما سکتا ہے۔ البتہ اگلا حصہ بالکل ہیونڈائی کی دیگر گاڑیوں ہی کی طرح ہے۔ ایک بڑی گِرل اور ایل ای ڈی روشنیوں کے ذریعے ہیونڈائی نے اس کی شکل کچھ بہتر بنانے کی کوشش کی ہے۔

ہیونڈائی آئیونِک کو جنوبی کوریا میں آئندہ ماہ دنیا بھر کے لیے متعارف کروایا جائے گا۔ بعد ازاں اسے نیو یارک آٹو شو اور پھر جنیوا آٹو شو میں بھی پیش کیا جائے گا۔

جاپان سے گاڑیوں کی پاکستان درآمد وقت کے ساتھ ساتھ آسان ہوتی جا رہی ہے۔ اب دیکھنا ہے کہ یہاں کتنے لوگ اس کورئین ہائبرڈ کو پاکستان منگوانے کا حوصلہ کر پاتے ہیں۔ اگر اس کی قیمت ٹویوٹا پریوس کے مقابلے میں کم ہوئی تو مجھے یقین ہے کہ پاکستان میں یہ ہائبرڈ گاڑی مشہور ہوسکتی ہے۔

Google App Store App Store

جواب چھوڑیں

آپ کا ای میل ایڈریس شائع نہیں کیا جائے گا.