جرمن آٹو مینوفیکچرر پورشَ کی سب سے زیادہ فروخت ہونے والی گاڑی مکان SUV اگلی دہائی میں ایک مکمل الیکٹرک ورژن میں تبدیل ہو جائے گی۔
الیکٹرک گاڑیوں کی دنیا بھر میں مقبولیت کسی سے ڈھکی چھپی نہیں اوران کا رحجان بڑھتا ہی چلا جا رہا ہے۔گاڑیاں بنانے والے بڑے اداروں کی اکثریت اپنی گاڑیوں کے الیکٹرک ورژنز جاری کر چکے ہیں جنہیں مارکیٹ میں زبردست ردعمل ملا ہے۔ الیکٹرک مقابلہ بہت تیزی سے بڑھ رہا ہے اور آٹو مینوفیکچررز سب سے آگے نکلنے کا راستہ ہموار کرنے کے لیے حکمت عملیاں ترتیب دے رہے ہیں۔اسی طرح پورشَ نے بالآخر موجودہ گاڑیوں میں سے پہلی بار کسی کو مکمل طور پر الیکٹرک بنانے کا فیصلہ کیا ہے۔ الیکٹرک سیکٹر میں آغاز کرنے کے لیے جرمن آٹو مینوفیکچرر نے اپنی سب سے زیادہ فروخت ہونے والی موجودہ کار، مکان SUV کا انتخاب کیا ہے۔ پورشَ کی جانب سے کیے گئے اعلان کے مطابق یہ SUV اگلی دہائی سے ہی مکمل طور پر الیکٹرک پیداوار بننا شروع ہو جائے گی۔
پورشَ مکان 2018ء میں 90,000 یونٹس کی فروخت کے ساتھ کینے SUV اور پینامیرا سمیت کمپنی کی بنائی گئی دیگر تمام گاڑیوں کو پیچھے چھوڑ دیا۔ پورشَ کی الیکٹرک گاڑیوں کی لائن اَپ میں ٹیکان سیڈان اور کراس ٹورِسمو شامل ہیں۔ ٹیکان کی پیداوار2019ء کے اختتام پر شروع ہوگی جو پورشَ الیکٹرک کونسپٹ مشن کا حتمی پروڈکشن ورژن بھی ہے۔ کراس ٹورسمو ٹیکان کا کراس اوور ورژن ہے جس کی پیداوار کا آغاز 2020ء میں متوقع ہے۔ اس لیے مکان SUV کمپنی کی لائن اپ کی تیسری EV ہوگی۔
آٹومینوفیکچرر کی جانب سے مکان کے الیکٹرک ورژن کے بارے میں بہت زیادہ تفصیلات ظاہر نہیں کی گئیں۔ کم از کم ہم یہ جانتے ہیں کہ مکان اسی 800V چارجنگ سسٹم کی حامل ہوگی جو ٹیکان اور اس کے کراس اوور ورژن کراس ٹورسمو میں استعمال کیا جائے گا۔ آنے والی مکان EV کا ایک اہم پہلو یہ ہے کہ یہ فاسٹ چارجنگ آپشن بھی پیش کرے گی۔ پورشَ کے کسی بھی چارجنگ اسٹیشن پر اسے سڑک پر 250 میل کی رینج تک چلنے کے لیے چارج ہونے میں صرف 15 منٹ لگیں گے۔ ایک اہم اعلان میں پورشَ نے کہا کہ اگلی جنریشن کی مکان مکمل طور پر الیکٹرک ہوگی۔ اس نے مستقبل میں SUV کے ہائبرڈ ورژن کے سامنے آنے کے امکانات بھی ختم کردیے ہیں۔ یہ گاڑی مکمل طور پر ایک EV کی صورت میں پیش کی جائے گی۔
واضح رہے کہ پورشَ پہلے ہی اپنی متعدد گاڑیوں کے ہائبرڈ ورژن پیش کر چکا ہے اور 2025ء تک اپنی آدھی گاڑیوں کو الیکٹرک بنانے کا ہدف بھی رکھتا ہے۔ ٹیکنالوجی میں تبدیلی کے لیے آٹو میکر 2022ء کے اختتام تک 6 ارب یوروزکی سرمایہ کاری کر رہا ہے۔ کمپنی کی گاڑیوں میں الیکٹرک پروپلژن ٹیکنالوجی کا اضافہ مسابقت کی صورت میں صنعت کو واقعی فائدہ پہنچائے گا۔
ہماری طرف سے اتنا ہی۔ آٹوموبائل انڈسٹری کی تازہ ترین خبروں کے لیے پاک ویلز پر آتے رہیے۔
