آٹوموٹیو پالیسی برائے سال 2016 تا 2021 نافذ ہوجانے کے بعد پاکستان میں گاڑیوں کا شعبہ ایک نئے دور میں داخل ہوچکا ہے۔ گاڑیاں تیار کرنے والے مقامی ادارے بھی بدلتی ہوئی صورتحال کو محسوس کر رہے ہیں جبکہ ملک کی مجموعی معاشی صورتحال سے عوام کا طرز زندگی بھی بہتر ہوتا نظر آرہا ہے۔ ان عوامل کے باعث غیر ملکی ادارے بھی پاکستان کی طرف متوجہ ہونے اور سرمایہ کاری کے ذریعے کاروباری مواقع سے فائدہ اٹھانے کی تیاری کر رہے ہیں جس سے بہتر مستقبل کی امیدیں مزید روشن نظر آتی ہیں۔
رواں سال کا آخری مہینہ یعنی دسمبر 2016 جاری و ساری ہے اور اس ماہ انڈس موٹرز 2 نئی ٹویوٹا گاڑیاں متعارف کروا چکا ہے جبکہ پاک سوزوکی بھی اختتامی ہفتے میں نئی گاڑی متعارف کروانے کی تیاریوں میں مصروف ہے۔ اگر پاک سوزوکی متوقع گاڑی پیش کرنے میں کامیاب رہا تو یہ پاکستان کی تاریخ میں پہلا موقع ہے کہ جب ایک ہی ماہ میں تین گاڑیاں متعارف کروائی گئیں۔
غیر ملکی کار ساز اداروں کی جانب سے پاکستان میں سرمایہ کاری اور کارخانہ لگانے میں اظہار دلچسپی کے بعد نئی گاڑیوں کی پیشکش کا یہ سلسلہ آئندہ سال بھی جاری رہنے کی توقع ہے۔ علاوہ ازیں ایک عرصے سے پاکستان میں گاڑیاں تیار کرنے والے ادارے بھی اپنی ساکھ مضبوط تر کرنے کے لیے نئی گاڑیاں فراہم کرنے کی تیاری کر رہے ہیں۔ پاک ویلز کے باخبر ذرائع نے سال 2017 میں پیش کی جانے والی چار گاڑیوں سے متعلق اہم معلومات حاصل کی ہیں جنہیں قارئین کی خدمت میں پیش کیا جارہا ہے۔
سوزوکی سیاز (Suzuki Ciaz)
جی ہاں خواتین و حضرات، پاک سوزوکی ایک بار پھر سیڈان کے میدان میں اترنے کے لیے تیار ہوچکا ہے اور سوزوکی سیاز کے ساتھ قدم رکھ رہا ہے۔ ایک اندازے کے مطابق سوزوکی سیاز کو سال 2017 کی پہلی سہہ ماہی کے دوران متعارف کروایا جائے گا۔ گو کہ اس کی قیمت سے متعلق کوئی معلومات دستیاب نہیں تاہم امید کی جاسکتی ہے کہ پاک سوزوکی اس حوالے سے اعلان کرتے ہوئے سوزوکی کزاشی سے حاصل ہونے والا سبق ضرور یاد رکھے گا۔
یہ بھی پڑھیں: سوزوکی سیاز – ایک بہترین فیملی سیڈان کہلائے جانے کی حقدار!
سوزوکی سلیریو (Suzuki Celerio)
پاکستان میں چھوٹی، کم قیمت، جدید ٹیکنالوجی کی حامل مقامی سطح پر تیار گاڑی کی بہت طلب ہے۔ چھوٹی گاڑیوں میں عالمی شہرت یافتہ سوزوکی سے منسلک پاک سوزوکی سے اس ضمن میں بہت سی امیدیں وابستہ ہیں۔ پاک سوزوکی نے سال 2014 میں ویگن آر متعارف کروائی جس نے بہت جلد پاکستانیوں کے دلوں میں گھر کرلیا۔ سوزوکی ویگن آر کی مقبولیت کے درپردہ عوامل پر نظر ڈالیں تو اس میں سوزوکی نام کے علاوہ جدید ٹیکنالوجی کا حامل ہونا بھی قابل ذکر ہے۔ بہرحال، پاک ویلز ذرائع کے مطابق سال 2017 کی دوسری سہہ ماہی میں سوزوکی کلٹس کی جگہ سوزوکی سلیریو کو باضابطہ طور پر متعارف کروایا جائے گا۔ پاکستان میں سوزوکی سلیریو کو 1000cc انجن کے ساتھ پیش کیا جانا متوقع ہے۔
یہ بھی پڑھیں: کلٹس کا دور ختم؛ سوزوکی سلیریو آیا چاہتی ہے!
آوڈی Q2 کراس اوور
گو کہ جرمن کار ساز ادارے آوڈی کا نام صرف مہنگی اور پرتعیش گاڑیوں کے طور پر جانا جاتا ہے تاہم پاکستان میں آوڈی اب اپنی کم قیمت گاڑیاں متعارف کروا کر مزید خریداروں کو اپنی طرف متوجہ کرنا چاہتے ہیں۔ آوڈی پاکستان نے 1000cc ٹربوچارجڈ انجن کی حامل Q2 آئندہ سال کی پہلی سہہ ماہی میں پیش کرنے کا اعلان کردیا ہے۔ ہمارے ذرائع کے مطابق پاکستان میں آوڈی Q2 کو 30 سے 33 لاکھ روپے کی قیمت میں متعارف کروایا جاسکتا ہے تاکہ یہ دیگر ہم پلہ گاڑیوں کا ڈٹ کر مقابلہ کرسکے۔
مزید پڑھیں: پاکستان میں آوڈی Q2 کراس اوور پیش کرنے کا اعلان کردیا گیا
آوڈی A5 اسپورٹس بیک
کوپے جیسی سیڈان یا سیڈان جیسی کوپے سمجھی جانے والی یہ گاڑی دراصل آوڈی A7 سے اخذ کی گئی ہے۔ اس گاڑی کا ہدف کم قیمت میں جرمن سیڈان رکھنے کے خواہشمند افراد ہیں۔ آوڈی پاکستان اس گاڑی سے متعلق مزید معلومات آئندہ سال 2017 کی پہلی سہہ ماہی میں فراہم کردے گی۔
یہ بھی پڑھیں: آوڈی A5 اور آوڈی S5 کا ماڈل 2017؛ بہتر انداز اور سُبک رفتار!
