ٹویوٹا پرایوس پرائم پلگ-ان: دور حاضر کی بہترین ہائبرڈ گاڑی!

Toyota-Prius-Prime-featured

جب بھی ہائبرڈ ٹیکنالوجی کی بات کی جائے تو فوراً ٹویوٹا پرایوس (Toyota Prius) کا نام ذہن میں آتا ہے اور آخر کیوں نہ آئے؟ یہ دنیا میں سب سے زیادہ فروخت ہونے والی ہائبرڈ گاڑی جو ہے۔ دسمبر 1997 میں جب پہلی بار ٹویوٹا پرایوس کو پیش کیا گیا تو یہ ہائبرڈ ٹیکنالوجی کے ساتھ تیار کی جانے والی سب سے زیادہ گاڑیوں کی فہرست میں اول نمبر پر تھی۔ اس کے بیرونی انداز میں چند خامیاں ہیں جس کی وجہ سے پرایوس کے کئی مزاحیہ نام بھی رکھے گئے ہیں۔ لیکن آپ اس گاڑی کا جتنا چاہیں مذاق اڑالیں، ایک بات تو یہ ہے کہ یہ گاڑی ایندھن کے معاملے میں انتائی کفایت شعار ہے اور یہی خصوصیت اس کی فروخت میں مسلسل اضافے کا باعث بن رہی ہے۔

ٹویوٹا پرایوس کی چوتھی جنریشن کو اب سے چھ ماہ قبل پیش کیا گیا ہے۔ اس کے بیرونی اور اندرونی حصے میں قابل ذکر تبدیلیاں کی گئیں تھیں۔ ماضی میں ٹویوٹا پرایوس مختلف انداز سے پیش کی جاتی رہی ہے جس میں ہیچ بیک پرایوس C (ایکوا)، پرایوس V (ایلفا) اور عام پرایوس کے علاوہ پلگ-ان ماڈل بھی شامل تھا۔ آج ٹویوٹا نے پرایوس کے پلگ –ان ماڈل کی دوسری جنریشن متعارف کروائی ہے جسے پرایوس پرائم پلگ-ان کا نام دیا گیا ہے۔

یہ بھی پڑھیں: ٹویوٹا پرایوس میں دلچسپی رکھنے والوں کے لیے اہم معلومات!

اس سے پہلے پیش کیا گیا پلگ-ان ماڈل عام پرایوس ہی کے پلیٹ فارم پر تیار کیا گیا تھا تاہم اس بار پلگ-ان کی دوسری جنریشن ٹویوٹا کے نئے عالمی آر کیٹکچر (TNGA) پر بنائی گئی ہے۔ اس کا اگلا اور پچھلا حصہ دونوں ہی کا انداز کافی مختلف ہیں۔ اگلے حصے میں چار نئی ایل ای ڈی لائٹس دیکھی جاسکتی ہیں جبکہ عقب میں آپ کو ایک کونے سے دوسرے کونے تک پھیلی ہوئی لائٹس بہت واضح نظر آئیں گی۔

نئی پرایوس پرائم پلگ –ان میں بجلی کے استعمال کو پہلے سے زیادہ بہتر بنایا گیا ہے اور اب یہ گاڑی صرف بجلی کی مدد سے زیادہ رفتار پکڑ سکتی ہے۔ اس کا تمام تر سہرا 8.8 کلوواٹ کی لیتھیم بیٹری کے سر باندھا جانا چاہیے۔ پرایوس کی یہ بیٹری تقریباً 120 وولٹ پر 5.5 گھنٹے میں چارج کی جاسکتی ہیں جبکہ 240 وولٹ پر یہ دورانیہ بھی نصف ہوجائے گا۔ ان نئی بیٹریوں کو 1800cc چار سلینڈر انجن کے ساتھ منسلک کیا گیا ہے۔ ٹویوٹا کا دعوی ہے کہ پرایوس پلگ-ان اوسطً 168 میل فی گیلن بمطابق 100 کلومیٹر فی 1.4 لیٹر فراہم کرے گی۔ بیٹری کو مکمل چارج کرنے اور 43 لیٹر ٹینک کو پیٹرول سے پُر کرنے کے بعد پرائم پلگ-ان میں 965 کلومیٹر تک سفر کیا جاسکتا ہے جبکہ صرف بجلی پر چلایا جائے تو یہ گاڑی 36 کلومیٹر سے بھی زائد سفر کرسکتی ہے۔ ٹویوٹا پرایوس پرائم زیادہ سے زیادہ 135 کلومیٹر فی گھنٹہ کی رفتار کو چھوسکتی ہے۔

اندرونی حصے میں پر نظر ڈالیں تو سب سے زیادہ نمایاں چیز ٹیسلا کی طرز کا 11.3 انچ ملٹی میڈیا ڈسپلے نظر آئے گا۔ رنگین اسکرین کے حامل اس نیوی گیشن سسٹم کے ساتھ JBL ساؤنڈ سسٹم اور بنا تار موبائل فون چارج کرنے کی سہولت بھی موجود ہے۔

موسم گرما کا استقبال: ٹویوٹا پرایوس سبز لیمو کے رنگ میں دستیاب!

حفاظتی سہولیات کی بات کریں تو اس میں ٹویوٹا سیفٹی سینس کے ساتھ وہ تمام خصوصیات شامل ہیں جو دور جدید کی بہترین گاڑی کا خاصہ ہیں۔ اس طرز کی خصوصیات آپ کو مہنگی اور پرتعیش لیکسز گاڑیوں میں نظر آئیں گی۔ یہ بات قابل تحسین ہے کہ ٹویوٹا (Toyota) نے اسے پرائم پلگ-ان کی نئی جنریشن میں پیش کرنے کا فیصلہ کیا۔

ٹویوٹا پرایوس پرائم پلگ-ان کی قیمت سے متعلق فی الحال کوئی معلومات دستیاب نہیں۔ اسے رواں سال 2016 کے آخر میں ریاستہائے متحدہ امریکا میں پیش کیا جائے گا جس کے بعد دیگر ممالک کی باری آئے گی۔ ہمیں امید ہے کہ جاپان میں اس کی پیش کش کے چند ماہ بعد ہم اسے پاکستان میں درآمد ہوتا ضرور دیکھ سکیں گے۔

Fazal Wahab

I am Civil Engineer by Profession and have love for High Rise Towers and Underground construction. But Automobiles is my first love. Its my passion to know and share about anything new in automobile industry.

Top