اپریل میں یاماہا کی جانب سے YBR125 پیش کیے جانے کے بعد پاکستان میں موٹر سائیکل کی صنعت میں تحریک نظر آرہی ہے۔ یہ بات درست ہے کہ کم قیمت اسپورٹس بائیک پاکستان میں متعارف کرنے کا سہرا یاماہا کے سر باندھنا چاہیے لیکن جناب! کھیل ابھی ختم نہیں ہوا بلکہ ابھی تو پارٹی شروع ہوئی ہے۔
پاکستانی ادارے روڈ پرنس نے 150 سی سی اسپورٹس بائیک پیش کرنے کی تیاریاں مکمل کرلی ہیں۔ بجلی سے اسٹارٹ ہونے والی یہ اسپورٹس بائیک 4 اسٹروک سلنڈر انجن کی حامل ہے اور اس میں 5 اسپیڈ گیئر باکس بھی شامل ہے۔ اس بائیک سوزوکی انازوما 250 سی سی جیسا ڈیجیٹل میٹر بھی لگایا گیا ہے۔
روڈپرنس 150 سی سی بائیک کی قیمت لگ بھگ 1,80,000 روپے ہوگی البتہ میرے ذاتی خیال میں روڈ پرنس جیسے برانڈ کو دیکھتے ہوئے یہ قیمت کچھ زیادہ معلوم ہو رہی ہے۔ اگر یہی 150 سی سی ہنڈا یا پھر یاماہا جیسے برانڈ کی طرف سے پیش کی جاتی تو پاکستان میں اسے ہاتھوں ہاتھ لیے جانے کا زیادہ امکان تھا۔
روڈ پرنس پاکستان میں قریباً ایک دہائی سے کام کر رہی ہے لیکن یاماہا اور ہنڈا جیسے بڑے موٹر سائیکل برانڈز کو ٹکر دینے میں ناکام رہی ہے۔
بائیک انتہائی پرکشش ہے تاہم تفصیلی روشنی اسی وقت ڈالی جاسکتی ہے جب یہ روڈ پر دوڑنے کے لیے پیش کردی جائے لیکن پھر بھی اس کی قیمت 1,50,000 روپے تک ہونی چاہیے تاکہ بائیک کے شوقین افراد کو روڈ پرنس لینے کے لیے اچھا نکتہ مل سکے۔
