اس مضمون کا پہلا حصہ پڑھنے کے لیے یہاں کلک کریں
ہونڈا سِوک کے پہیے اور سسپنشن
پاکستان میں دستیاب نویں جنریشن ہونڈا سِوک میں صارفین کو سسپنشن کے بہت مسائل درپیش ہوئے۔ اس بار ہونڈا ایٹلس نے سمجھداری کا ثبوت دیتے ہوئے دسویں جنریشن ہونڈا سِوک میں وہی سسپنشن شامل کیے ہیں جو دنیا کے دیگر ممالک میں نئی سِوک کا حصہ ہیں۔ ہونڈا سِوک 1.5 ٹربو میں اگلی جانب میکفرسن اسٹروٹ سسپنشن جبکہ پچھلی جانب ملٹی-لنک سسپنشن لگائے گئے ہیں۔ سِوک کے دیگر ماڈلز میں بھی یہی سسپنشن شامل ہیں کیوں کہ عالمی سطح پر دسویں جنریشن انہی سسپنشن کے ساتھ پیش کی جارہی ہے۔
اس سے قبل عالمی سطح پر نویں جنریشن سِوک میں ملٹی-لنک سسپنشن شامل کیے جانے کے باوجود ہونڈا ایٹلس نے پاکستان میں ری ایکٹیو-لنک ڈبل وشبون سسپنشن ہی کے ساتھ سِوک فروخت کرنے کا فیصلہ کیا تھا۔ البتہ دسویں جنریشن میں ایسی غلطی نہیں دہرائی گئی۔ پاکستانی سِوک میں شامل ملٹی-لنک سسپنشن کو بہتر بھی بنایا گیا ہے جس سے سِوک کی گراؤنڈ کلیئرنس میں کافی واضح فرق دیکھا جاسکتا ہے۔ دیگر ممالک میں دستیاب سِوک کی زمین سے اونچائی 133 ملی میٹر ہے جبکہ پاکستان میں متعارف کروائی جانے والی سِوک کی زمین سے فاصلہ 155 ملی میٹر رکھا گیا ہے۔اس کے علاوہ دیگر ممالک میں سِوک ٹربو کے ساتھ 17 انچ پہیے شامل کیے گئے ہیں جبکہ پاکستان میں 1.5 ٹربو کے ساتھ 16 انچ الائے ویلز (215/55 R16) پیش کیے گئے ہیں۔
پہیوں اور سسپنشن کی بات چل رہی ہے تو مزید ایک دلچسپ بات کرتے چلیں۔ گو کہ ہونڈا سِوک 2016 میں نئے ملٹی-لنک سسپنشن کی شمولیت قابل ذکر ہے تاہم اس سے بڑی اور اہم پیش رفت پچھلی جانب ہائیڈرولک بشنگ کا دیا جانا ہے۔ یہ بشنگ صرف برق رفتار گاڑیوں ہی میں دی جاتی ہے اور ہونڈا بھی انہیں صرف 1.5 ٹربو ہی میں فراہم کر رہا ہے۔ حتی کہ امریکی میں تیار کی جانے والی 2000cc سِوک میں بھی 16 انچ پہیوں کے ساتھ انہیں شامل نہیں کیا گیا۔ منفرد بشنگ کی بدولت سسپنشن سے آنے والی ممکنہ شور اور لرزشن کے امکانات کم ہوتے ہیں نیز گاڑی پر گرفت میں مدد ملتی ہے۔ ہونڈا ایٹلس کی ویب سائٹ یا بروشر میں سوک 1.5 ٹربو کے سسپنشن میں اس حوالے سے کوئی معلومات درج نہیں ہیں۔ نیویارک میں موجود ہونڈا کے ایک نمائندے نے بتایا کہ 1.5 ٹربو میں 17 انچ پہیوں کے ساتھ بہتر سسپنشن شامل کیے گئے ہیں۔ علاوہ ازیں دیگر ممالک میں سِوک 1.5 ٹربو میں اگلی اور پچھلی جانب اسٹیبلائزر بارز بھی دی گئی ہیں البتہ ہونڈا ایٹلس نے اس حوالے سے صارفین کو اب تک کوئی معلومات فراہم نہیں کیں۔
اس حوالے سے مزید تصدیق کے لیے میں نے ہونڈا انڈونیشیا اور تھائی لینڈ سے رابطہ کیا تاہم اب تک ان کا کوئی جواب موصول ہوا کہ آیا وہاں بھی سِوک 1.5 ٹربو میں ہائیڈرولک بشنگ شامل ہیں یا نہیں۔ البتہ پاکستان میں کئی ایک ڈیلرز نے اس حوالے سے تصدیق کی ہے کہ پاکستانی سِوک میں ہائیڈرولک بشنگ شامل / دستیاب نہیں ہیں۔ اگر یہ بات سچ ہے کہ دیگر ممالک کے برعکس ہونڈا ایٹلس نے ٹربو ماڈل میں بہتر سسپنشن شامل نہیں کیے تو پاکستانی سِوک کی کارکردگی پر ایک بڑا سوالیہ نشان لگ جاتا ہے۔ اور مجھے افسوس ہے کہ پاکستانی صارفین کو سِوک میں سفر کا وہ مزہ نہیں مل سکے گا جو دیگر ممالک کے شہریوں کو حاصل ہے۔ یہاں ایک بار پھر یاد دہانی ضرور سمجھتا ہوں کہ دیگر ممالک کے برعکس پاکستان میں تیار شدہ سِوک 1.5 ٹربو کی گراؤنڈ کلیئرنس زیادہ اور پہیوں کا سائز کم ہے۔شاید پاکستانی صارفین کے لیے سسپنشن اپڈیٹ نہ کیے جانا معمولی بات ہو لیکن حقیقت یہی ہے کہ عالمی سطح پر سِوک 1.5 ٹربو کو انہی کی وجہ سے 1.8 اور 2.0 سے بہتر گرفت والی گاڑی قرار دیا جارہا ہے۔
ہونڈا سِوک کا باہری حصہ
دسویں جنریشن ہونڈا سِوک X چاہے دنیا کے جس بھی حصے میں بنائی جائے، اس کی تیاری کےلیے استعمال ہونے والے ساز و سامان ایک جیسا ہی رہے گا۔ یہی وجہ ہے کہ سِوک کا ظاہری حصہ بشمول ڈیزائن سمیت ہر چیز میں آپ کو امریکی اور پاکستانی سِوک میں واضح مماثلت نظر آئے گی۔ البتہ پاکستانی سِوک ٹربو میں LED لائٹس کی عدم دستیابی نے ایک غیر معمولی فرق کو جنم دیا ہے۔ دنیا کے دیگر تمام ممالک میں سِوک کا بہترین ماڈل LED لائٹس ہی کے ساتھ پیش کیا جارہا ہے لیکن ہونڈا ایٹلس نے ان سب کے خلاف جاتے ہوئے پاکستان میں پرانی پروجیکٹر لایٹس ہی کے ساتھ ٹربو ماڈل متعارف کروا دیا۔ میں نے سِوک کے ممکنہ خریداروں سے بات کی تو انہوں نے بھی LED لائٹس کی عدم شمولیت پر افسوس کا اظہار کرتے ہوئے کہا کہ وہ پہلی فرصت میں انہیں اپنی سِوک کا حصہ بنانا چاہیں گے۔ یہاں یہ بات بھی قابل ذکر معلوم ہوتی ہے کہ تھائی لینڈ میں LED لائٹس درآمد کرنے پر لگ بھگ 1100 ڈالر لاگت آئے گی۔ یقین جانیئے کہ اگر ہونڈا ایٹلس بھی دیگر ممالک کی روایت کو برقرار رکھتے ہوئے سِوک کے بہترین ماڈل میں LED لائٹس شامل کرتا تو سِوک 1.5 ٹربو کی بات ہی اور ہوتی۔ فی الحال ہم صرف امید ہی کرسکتے ہیں کہ ہونڈا پاکستان اسے مستقبل میں پیش کیے جانے والی ماڈل کا حصہ بنائے گا۔
اس مضمون کا اگلا حصہ پڑھنے کے لیے یہاں کلک کریں
