اٹلس ہونڈا نے نئے اسٹیکر کے ساتھ پرانی سی جی-125 متعارف کروا دی – واقعی!


اٹلس ہونڈا پاکستان میں موجود اپنے صارفین کو ہمیشہ حیران کرتا رہتا ہے، اور اُن کے لیے جدید ٹیکنالوجی کی حامل نئی اور دلچسپ مصنوعات پیش کرتا رہتا ہے۔ اس مرتبہ بھی کمپنی نے CG-125 کے ساتھ ایک نیا اور جدید اسٹیکر متعارف کروایا ہے۔ آپ حیران تو نہیں ہو رہے نا؟  سکون سے بیٹھیں اور سوچیں: ایک نیا چمکتا دمکتا اسٹیکر۔ 

عوام کو ہمیشہ یہ شکایت رہتی ہے کہ پاکستان میں کوئی ادارہ ایک مرتبہ شہرت حاصل کرلے  تو اس کی مصنوعات کا معیار برقرار نہیں رہتا، اٹلس ہونڈا کے بارے میں ایسا نہیں کہہ سکتے، وہ ہمیشہ ویسی ہی چیز بناتے ہیں جیسی لوگ چاہتے ہیں، جس کی بہترین مثال ہے CG 125، ایک اعلیٰ درجے کی، معیار اور تسلسل کے ساتھ سالہا سال کی پیداوار، کسی بھی فیچر کا نام لیں اور اس موٹر سائیکل میں پائیں۔ سالہا سال میں بھی اس کی پروڈکٹ ویسی کی ویسی ہی ہے، موٹر سائیکل پر بیٹھتے ہی پرانی یادیں تازہ ہو جاتی ہیں، گویا ماضی میں سفر کیا جا رہا ہے۔ اوہ، آواز کا تو ہم ذکر کرنا ہی بھول گئے؛ موٹر سائیکل کی وہی پرانی آواز، تھروٹل بڑھائیں اور اس کی پُرسکون آواز میں کھو جائيں۔ بلاشبہ، اس موٹر سائیکل کی آدھی فروخت تو صرف اس کی آواز کی وجہ سے ہوتی ہے۔ 

واقعی یہ مقامی آٹو انڈسٹری کے لیے سال کی سب سے بڑی خبر ہے۔ کمپنی نے عوام کے پرزور اصرار کو مدنظر رکھتے ہوئے اسٹیکر تبدیل کردیا ہے؛ باقی تمام فیچرز اور خصوصیات وہی ہیں۔ موٹر سائیکل کی موجودہ قیمت 1,24,500 روپے ہے۔ 

موٹر سائیکل کی زبردست تصاویر یہ دیکھیں: 

اپنے تبصرے نیچے پیش کیجیے۔ 

وضاحت: یہ طنزیہ تحریر/خبر ہے۔


Google App Store App Store

My name is M. Ali Laghari and I love to read and write about Cars.

Top