برطانیہ میں ٹریفک قوانین کی خلاف ورزی کرنے والے افراد کو مزید سخت سزائیں دینے کی تجویز پر غور کیا جارہا ہے جس کا مقصد ملک میں ٹریفک حادثات اور ان میں ہونے والی ہلاکتوں پر قابو پانا ہے۔ اس حوالے سے ایک قانونی مسودہ بھی تیار کیا جارہا ہے جس کے مطابق ڈرائیونگ کے دوران کسی کی جان لینے والے کو عمر قید جبکہ مسلسل ٹریفک اصولوں کو توڑنے والے فرد کو کم از کم 14 سال قید کی سزا سنائی جاسکے گی۔
ڈرائیوروں کی لاپرواہی اور غفلت کے باعث برطانیہ میں سالانہ درجنوں شہری موت کے منہ میں دھکیل دیئے جاتے ہیں۔ ان حادثات کی بنیادی وجہ دوران ڈرائیونگ موبائل فون کا استعمال اور نشے میں دھت ہو کر گاڑی چلانے کو قرار دیا جاتا ہے۔ برطانوی حکومت کی کوشش ہے کہ غیر معمولی رفتار سے گاڑیاں چلانے اور عام شاہراہوں پر گاڑیوں کی ریس منعقد کرنے والوں کی بھی حوصلہ شکنی کی جائے۔
فی الوقت برطانیہ میں گاڑی چلاتے ہوئے دانستہ یا غیر دانستہ کسی کی جان لینے والے ڈرائیور کو زیادہ سے زیادہ 14 سال سزا دی جاتی ہے۔ تاہم ایک اندازے کے مطابق سال 2015 میں قاتل ڈرائیوروں کی دی جانے والی اوسط سزا 4 سال سے بھی کم رہی ہے۔ گزشتہ سال 122 افراد کو ڈرائیونگ کے دوران عام شہریوں کو نقصان پہنچانے کی پاداش میں سزائیں سنائی گئیں جن میں سے 21 افراد غیر ذمہ دارانہ ڈرائیونگ کے مرتکب پائے گئے۔
یہ بھی پڑھیں: دوران ڈرائیونگ موبائل فون کا استعمال – ایک جان لیوا عمل
برطانیہ کے وزیر انصاف سام جیاما نے اس حوالے سے کہا کہ ڈرائیوروں کی غفلت سے کئی زندگیاں تباہ ہوجاتی ہیں اور ان کی غیر ذمہ داران حرکت سے کئی خاندانوں کو تکلیف برداشت کرنا پڑتی ہے۔ انہوں نے مزید کہا کہ انسانی جان کا کوئی نعم البدل تو نہیں ہے تاہم حکومت کی کوشش ہے کہ قاتل ڈرائیوروں کو ان کے جرم کے مطابق زیادہ سے زیادہ سزائیں دی جائیں۔ وزیر انصاف نے دو ٹوک الفاظ میں پیغام دیتے ہوئے کہا کہ اگر آپ خطرناک ڈرائیونگ کرتے ہوئے کسی کی جان لیتے ہیں تو پھر آپ کو تادم مرگ جیل کی سلاخوں کے پیچھے بھیجا جاسکتا ہے۔
برطانوی ذرائع ابلاغ میں شایع ہونے والی مختلف رپورٹس میں بتایا گیا ہے کہ گاڑی چلاتے ہوئے موبائل فون کے استعمال سے آئے دن عام شہریوں کے پہیوں تلے کچلے جانے کے واقعات بڑھ رہے ہیں۔ اس کی مثال گزشتہ ہفتے ہونے والے ایک حادثے سے لی جاسکتی ہے جس میں ڈرائیونگ کے دوران موبائل فون استعمال کرنے والے ٹرک ڈرائیور کے بروقت بریک نہ لگانے سے ایک خاتون اور ان کے تین بچے ہلاک ہوگئے۔ کچھ عرصے قبل ڈرائیونگ کے دوران موبائل فون استعمال کرنے کی حوصلہ شکنی کے لیے جرمانے کی رقم 100 پاؤنڈ سے بڑھا کر 200 پاؤنڈ جبکہ بلیک پوائنٹ 3 سے بڑھا کر 6 کردی گئی ہے۔
