گو کہ ٹرانسفارمرز کو گاڑیوں سے متعلق بہترین فلموں میں شمار نہیں کیا جاتا لیکن بہرحال یہ فلم سیریز خاصی مقبول ہے۔ فلم کی کہانی بیرون دنیا سے آنے والے مخلوق کے گرد گھومتی ہے جو زمین پر رہنے کے لیے سُپر کارز کا روپ دھار لیتے ہیں۔ یہی وجہ ہے کہ آپ کو ٹرانسفارمرز کی تمام ہی فلموں میں برق رفتار چمکتی دمکتی گاڑیوں کے جھنڈ نظر آئیں گے۔ فلم کے ہدایتکار مائیکل بے کی جانب سے فلم سیریز میں بے شمار گاڑیاں استعمال کی جاچکی ہیں اور اب فہرست میں ایک نئی مرسڈیز AMG جی ٹی آر کا اضافہ ہونے جارہا ہے۔
یہ بھی پڑھیں: لیونارڈو ڈی کاپریو ووکس ویگن ڈیزل گیٹ اسکینڈل پر فلم بنائیں گے
جرمن کار ساز ادارے مرسڈیز نے گزشتہ ہفتے ہی برطانیہ میں ہونے والے ایک پروگرام میں نئی GT R متعارف کروائی ہے۔ یہ بات اس کی مقبولیت کا اندازہ لگانے کے کافی ہے کہ صرف چند ہی روز میں 577 ہارس پاور کی نئی مرسڈیز نے صرف شائقین ہی کو نہیں بلکہ فلم سازوں کو بھی اپنی جانب متوجہ کرلیا ہے۔ نئی مرسڈیز AMG جی ٹی آر کے انتہائی جذباتی انداز کو دیکھتے ہوئے یہ بات یقین سے کہی جاسکتی ہے کہ اسے ضرور ایک آٹو بوٹ کے طور پر ٹرانسفارمرز میں شامل کیا جائے گا۔ فلم کے ہدایتکار مائیکل بے نے بھی اس بات کی تصدیق کرتے ہوئے بذریعہ ٹویوٹر اعلان کیا ہے کہ مرسڈیز کو ڈرفٹ نامی آٹو بوٹ کی صورت میں استعمال کیا جائے گا۔ ڈرفٹ اس سے قبل بھی ٹرانسفارمرز کی پرانی فلموں میں دکھایا گیا ہے تاہم اس کے لیے بوگاتی ویرون کو استعمال کیا گیا تھا۔
The samurai returns thanks to @MercedesAMG GT R. Looking good, Drift. #transformers @MercedesBenz pic.twitter.com/V3Gon9F6t2
— Michael Bay (@michaelbay) July 1, 2016
ٹرانسفارمرز کی اگلی فلم The Last Knight آئندہ سال 23 جون کو پیش کی جائے گی۔ اسے حسن اتفاق کہیں یا کچھ اور کہ انہی دنوں امریکا میں مرسڈیز AMG جی ٹی آر کی فروخت کا آغاز ہوگا۔ اس فلم میں دکھائے جانے سے نئی مرسڈیز کی پسندیدگی میں مزید اضافہ ہونے کی توقع کی جارہی ہے۔
