وزیر اعظم مہاتیر محمد کا عمران خان کو دیا گیا پروٹون ایکس70 ایس یو وی کا تحفہ پاکستان پہنچ گیا


وزیر اعظم ملائیشیا مہاتیر محمد نے وزیر اعظم پاکستان عمران خان کو پروٹون X70 ایس یو وی کا تحفہ دیا ہے، جو 16 دسمبر کو اسلام آباد میں منعقدہ ایک تقریب میں وصول کیا گیا۔ 

تفصیلات کے مطابق وفاقی دارالحکومت میں منعقد ایک تقریب ہوئی کہ جس میں وزیر اعظم کے مشیر عبد الرزاؤق داؤد نے عمران خان کی جانب سے ملائیشیا کے ہائی کمشنر سے گاڑی وصول کی۔ تقریب میں چیئرمین بورڈ آف انوسٹمنٹ محمد زاہد، الحاج آٹوموٹو کے ہلال آفریدی اور سینئر سرکاری عہدیداروں نے بھی شرکت کی۔ 

پروٹون ملائیشیا کا سرکاری آٹومیکر ہے جو اپنی برآمدات کو بڑھانے اور CKD پلانٹس لگانے کے لیے بیرونِ ملک بھی اپنا نیٹ ورک پھیلا رہا ہے۔ اپنے طویل مدتی منصوبوں کے تحت  ادارے نے پاکستان میں ایک CKD پلانٹ لگانے کے لیے الحاج گروپ کے ساتھ معاہدہ کیا، جو کراچی میں لگایا جائے گا۔ 

الحاج گروپ نے حال ہی میں آٹو ڈیولپمنٹ پالیسی ‏2016-21ء‎ کے تحت پاکستان میں پروٹون کاریں بنانے کے لیے گرین فیلڈ اسٹیٹس لیا۔ یہ پالیسی گرین فیلڈ اسٹیٹس کے ذریعے مارکیٹ میں آنے والے نئے اداروں کو ٹیکس پر متعدد رعایتیں دیتی ہے۔ الحاج پاکستان میں پروٹون کاروں کی ترویج کے لیے درکار وسائل اور تجربہ پہلے سے ہی رکھتا ہے۔ کمپنی نے پروٹون کاروں کے CKD یونٹس پیش کرنے کے لیے ابتدائی طور پر 30 ملین ڈالرز کی سرمایہ کاری کی کہ جس کے ذریعے وہ سالانہ 25,000 یونٹس کی گنجائش بنائے گا۔ پیداواری تنصیب جون 2020ء تک تیار ہونا متوقع ہے۔ یہ سرمایہ کاری روزگار کے 2,000 بلاواسطہ اور 20,000 بالواسطہ مواقع پیدا کرے گی۔

پروٹون X70 ایس یو وی نے دسمبر 2018ء میں کوالالمپور انٹرنیشنل موٹر شو (KLIMS) میں آغاز لیا تھا اور تب سے اب تک اس گاڑی کے 26,000 یونٹس فروخت ہو چکے ہیں۔ یہ پہلی پریمیم SUV ہے جو ملائیشیا کے اس آٹوموٹو برانڈ نے متعارف کروائی۔ یہ گاڑی پروٹون اور اس کے پارٹنر گیلی کی جانب سے مشترکہ طور پر بنائی گئی تھی۔ اسے تین مختلف ویریئنٹس میں تیار کیا گیا ہے: 

پروٹون X70 1.8 TGDi پریمیم 2WD 

پروٹون X70 1.8 TGDi ایگزیکٹو 4WD 

پروٹون X70 1.8 TGDi ایگزیکٹو 2WD 

کمپنی ایسی گاڑیاں بنانے کا دعویٰ کرتی ہے جو ملائیشیا اور دیگر آسیان ممالک کے خریداروں کی مارکیٹ ضروریات پر پورا اترتی ہیں۔ پروٹون الحاج کے ساتھ مل کر پاکستان کے مقامی آٹو سیکٹر میں داخل ہونے کے لیے تیار ہے اور یہ صارفین کے لیے بہت اہم صورت حال ہے کہ انہیں انتخاب کے لیے ایک اور برانڈ ملے گا۔ قبل ازیں ہائی کمیشن ملائیشیا پاکستان کی مقامی مارکیٹ میں پروٹون X70 ایس یو وی کی آمد کا اشارہ دے چکا ہے، جس کا مطلب ہے کہ یہ گاڑی جلد ہی پاکستان میں آ جائے گی۔ یہ دیکھنا دلچسپ ہوگا کہ کمپنی پاکستان میں اپنی اس گاڑی میں کون کون سے فیچرز لاتی ہے۔ مقامی طور پر متعارف کروائی گئی کسی بھی گاڑی کی قیمت پاکستان میں برانڈ کی کامیابی میں بہت اہم کردار ادا کرے گی۔ 

پروٹون کاروں کے حوالے سے اپنے خیالات نیچے تبصروں میں پیش کیجیے اور آٹوموبائل انڈسٹری کی مزید خبروں کے لیے پاک ویلز کے ساتھ رہیے۔


Google App Store App Store

Apart from being an Electrical Engineer by profession, he is an automotive content writer at PakWheels, a web designer and a photographer.

Top