پہلی تھل جیپ ریلی کا آغاز ہوگیا؛ 3 سے 5 نومبر تک جاری رہے گی

first-thal-jeep-rally-featured

پہلی تھل جیپ ریلی کا آغاز آج بروز جمعرات 3 نومبر کو ضلع مظفر گڑھ اور لیہ کے صحرائی علاقے میں ہو رہا ہے۔ اپنی نوعیت کی پہلی تین روزہ ریلی بروز ہفتہ 5 نومبر تک جاری رہے گی۔ پہلے روز ریلی میں حصہ لینے کے خواہشمند ڈرائیورز اور ریسرز کی رجسٹریشن کی جائے گی جبکہ دوسرے روز کوالیفائنگ مرحلہ اور تیسرے و آخری روز فائنل مقابلے ہوں گے۔ ایک اندازے کے مطابق 70 سے زائد ریسرز اس ریلی میں حصہ لینے کے لیے دلچسپی ظاہر کرچکے ہیں۔

پنجاب میں سیاحت کے فروغ میں سرگرم عمل ادارے TDCP اور ڈیفنس ہاؤسنگ اتھارٹی کے تعاون سے منعقد ہونے والی تھل جیپ ریلی 2016 ضلعی مظفر گڑھ کے علاقے چھانگا مانگا ٹیلہ ہیڈ محمد والا سے شروع ہو کر ضلع لیہ کے علاقے چوبارہ میں اختتام پذیر ہوگی۔ ریلی کا ٹریک 191 کلومیٹر طویل ہے جسے بین الاقوامی معیارات کو مدنظر رکھتے ہوئے بنایا گیا ہے۔ اس ریلی کی خاص بات پاکستان بھر سے بڑے اور نامور ریسرز کی شرکت ہے۔ ان میں چولستان ریلی کے سابق فاتح ریسرز نادر مگسی اور رونی پٹیل بھی شامل ہیں۔ علاوہ ازیں وزیر مملکت جام کمال بھی پہلی تھل جیپ ریلی میں حصہ لے رہے ہیں۔

یہ بھی پڑھیں: لواری سنو کراس ریلی 2016 – پاکستان میں اپنی طرز کی پہلی ریلی ریس!

تھل جیپ ریلی 2016 کی افتتاحی تقریب گذشتہ روز DHA ملتان میں منعقد کی گئی۔ اس تقریب میں موجود ڈرائیورز اور ریسرز نے جیپ ریلی کے انعقاد کو خوش آئند قرار دیا۔ چولستان جیپ ریلی کے سابق فاتح رونی پٹیل نے کہا کہ اس ریلی کا ٹریک عالمی معیار کا ہے اور اس میں حصہ لینے والے ڈرائیورز کے پاس غلطی کا کوئی موقع نہیں کیوں کہ ایک چھوٹی سے غلطی انہیں مقابلے سے باہر کرسکتی ہے۔ چولستان جیپ ریلی میں متعدد مرتبہ جھنڈے گاڑنے والے نادر مگسی نے جیپ ریلی کو تھل کا ایک بڑا ایونٹ قرار دیتے ہوئے امید ظاہر کی کہ ڈرائیورز کی بڑھتی ہوئی دلچسپی اور گرم جوشی سے تھل جیپ ریلی کا شمار جلد ہی ملک کی بڑی جیپ ریلیوں میں کیا جائے گا۔

پہلی تھل جیپ ریلی کے فاتح ڈرائیورز کو بروز ہفتہ 5 نومبر کو انعامات سے نوازا جائے گا۔ انعامی تقریب مظفر گڑھ ڈسٹرکٹ آفس میں منعقد ہوگی۔

Waseem Nasir

A media studies student from Multan. Highly passionate about cars. Keeps researching on latest cars introduced across the globe.

Top