دبئی میں D5 نمبر پلیٹ ساڑھے 9 کروڑ روپے میں نیلام

D5-plate-dubai

مشرق وسطی میں رہنے والوں کے منفرد، دلچسپ اور عجیب و غریب شوق سے کون واقف نہیں۔ تیل کی دولت سے مالا مال اس خطے کے امیر کبیر باسی کبھی کسی نئی سُپر کار کی خریداری کرتے نظر آتے ہیں، کبھی اپنی ‘گولڈ پلیٹڈ’ گاڑیوں میں سفر کرتے دکھتے ہیں تو کبھی قیمتی سونے اور ہیروں سے تیار کردہ دنیا کے مہنگے ترین ٹائرز کی بولیاں لگاتے نظر آتے ہیں۔ غرض کہ یہ ایک ہاتھ سے دولت کمانے اور دوسرے سے لٹانے کے فلسفے کی عملی تفسیر ہیں۔ اور پیسے لٹانے کا معاملے صرف گاڑیوں ہی تک محدود نہیں رہا بلکہ گزشتہ سالوں میں پرتعیش اور مہنگی گاڑیوں کے لیے خاص الخاص نمبر پلیٹس حاصل کرنے کے لیے بھی اربوں روپے اڑائے جا چکے ہیں۔

دبئی کے رہائشی بھارتی نژاد بلویندر سہانی کی جانب سے 5 کے ہندسے والی نمبر پلیٹ خریدی جانا اس کی تازہ مثال ہے۔ بین الاقوامی کمپنی RSA کے مالک بلویندر سہانی نے D5 نمبر پلیٹ کی نیلامی 90 لاکھ ڈالرز یعنی ساڑھے 9 کروڑ پاکستانی روپے میں جیت لی۔ یاد رہے کہ پچھلے ہفتے 29 اکتوبر کو ہونے والی اس نیلامی کا آغاز ساڑھے 27 لاکھ ڈالر سے ہوا تھا۔

یہ پہلا موقع نہیں کہ جب پراپرٹی ٹائیکون بلویندر سہانی نے اتنی خطیر رقم محض ایک نمبر پلیٹ حاصل کرنے پر صرف کردی ہو۔ گزشتہ سال وہ O9 ہندسے کی نمبر پلیٹ خریدنے کے لیے 68 لاکھ امریکی ڈالر یعنی 7 کروڑ پاکستانی روپے خرچ کرچکے ہیں۔ ابوصباح کے نام سے مشہور بلویندر سہانی کے پاس 6 رولز رائس ہیں اور وہ گزشتہ سال خریدی جانے والی O9 نمبر پلیٹ کی طرح D5 نمبر پلیٹ بھی اپنی رولز رائس کی زینت بنائیں گے۔

یہ بھی پڑھیں: بالی ووڈ ستاروں کی پر تعیش اور مہنگی گاڑیاں

dubai-d5-o9-number-plate

یہ جان کر آپ کو حیرت ہوگی کہ بلویندر سہانی اب بھی مہنگی ترین نمبر پلیٹ خریدنے کا ریکارڈ نہیں توڑ پائے۔ سعید الخوری نامی تاجر کو متحدہ عرب امارات کی مہنگی ترین نمبر پلیٹ خریدنے کا اعزاز حاصل ہے۔ انہوں نے سال 2008 میں “1” ہندسے والی نمبر پلیٹ 1.42 کروڑ امریکی ڈالر یعنی ڈیڑھ ارب پاکستانی روپے میں خریدی تھی اور آج 8 سال گزر جانے کے بعد بھی کوئی شخص یہ ریکارڈ نہیں توڑ پایا۔

مزید پڑھیں: اماراتی شخص نے ‘شارجہ 1’ نمبر پلیٹ 51 کروڑ روپے میں جیت لی

کیا آپ سمجھتے ہیں کہ یہ اصراف یا فضول خرچی ہے؟ یا پھر واقعی شوق دا کوئی مول نئیں۔۔۔

Asad Aslam

A PakWheeler with a degree in mass communication. He tweets as @masadaslam

Top