شیخوپورہ کارخانے کی توسیع مکمل؛ نئی ہونڈا موٹر سائیکلوں کی آمد متوقع

honda-bike-plant

پاکستان میں سب سے زیادہ موٹر سائیکلیں فروخت کرنے والے ادارے ایٹلس ہونڈا (Atlas Honda) نے شیخوپورہ میں قائم کارخانے کی توسیع مکمل کرنے کا اعلان کردیا ہے۔ 10 کروڑ ڈالر کی سرمایہ کاری سے کارخانے کی استعداد بڑھانے کا آغاز گزشتہ سال کیا گیا تھا جس کا مقصد آئندہ پانچ سالوں کے دوران ہونڈا موٹر سائیکلوں کی تیاری میں اضافہ اور نئی موٹر سائیکلیں متعارف کروانے کی تیاری کرنا ہے۔

مزید پڑھیں: ایٹلس ہونڈا 100 ملین ڈالر سرمایہ کاری: کیا جدید بائیک کا خواب پورا ہوگا؟

ملک کے سب سے بڑے شہر کراچی اور پنجاب کے صنعتی شہر شیخوپورہ میں موجود ایٹلس ہونڈا کے دو کارخانوں میں سالانہ 9 لاکھ موٹر سائیکلیں تیار کی جاتی رہی ہیں۔ نئی سرمایہ کاری سے کی جانے والی توسیع کے بعد ایٹلس ہونڈا سالانہ 12 لاکھ سے زائد موٹر سائیکلیں تیار کرنے کے قابل ہوچکا ہے۔ توسیع کا کام مکمل ہوجانے کے بعد شیخوپورہ کارخانے نے یکم اکتوبر سے جزوی طور پر کام شروع کردیا گیا ہے جبکہ رواں ماہ کی 20 تاریخ سے یہ کارخانہ اپنی مکمل استعداد کے ساتھ کام شروع کردے گا۔

ایٹلس ہونڈا کے ترجمان رضی الرحمن نے اس بارے میں بتایا کہ سرمایہ کاری کا مقصد کارخانوں میں تیار ہونے والی موٹر سائیکلوں کی تعداد کو دو گنا بڑھانا ہے جس سے پاکستان میں موٹر سائیکل کی بڑھتی ہوئی مانگ کو پورا کرنے مدد ملے گی۔ یاد رہے کہ اس ضمن میں 10 کروڑ ڈالر سرمایہ کاری کے علاوہ آئندہ سالوں میں 6 کروڑ ڈالر کی مزید سرمایہ کاری بھی کی جائے گی۔ انہوں نے مزید بتایا کہ شیخوپورہ کارخانے کی وسعت سے تقریباً 5650 افراد کو ملازمت اور کاروباری مواقع حاصل ہوئے ہیں۔

یہ بھی پڑھیں: ہونڈا 125 کی غیر معمولی مقبولیت کی 5 وجوہات

پنجاب کے صنعتی شہر شیخوپورہ میں موجود ایٹلس ہونڈا کا یہ کارخانہ لاہور سے تقریباً 40 کلومیٹر دور شمال مغرب میں موجود ہے۔ اس کارخانے میں CD 70 اور CG 125 سمیت تمام ہی ہونڈا موٹر سائیکلیں تیار کی جاسکتی ہیں۔ ایٹلس ہونڈا فی الوقت 8 موٹر سائیکلیں مقامی کارخانوں میں تیار کر رہا ہے جبکہ 2 موٹر سائیکلیں بیرون ممالک سے درآمد کر کے فروخت کی جارہی ہیں۔ ان میں 70cc، 100cc اور 125cc موٹر سائیکلیں بھی شامل ہیں۔

Top