سال 2020: پاکستان میں متوقع 5 سیڈان گاڑیاں

Toyota Yaris 2020

پاکستان میں گاڑیوں کا شعبہ آئندہ سال یعنی 2020 میں نت نئی گاڑیاں پیش کرنے جا رہا ہے۔ اسے آٹو پالیسی 2016-2021 کا ثمر کہا جائے تو غلط نہ ہوگا جس نے پاکستانی مارکیٹ میں نئے اداروں کی شمولیت کا راستہ ہموار کیا اور شعبے میں مسابقت کی فضا قائم کی۔ موجودہ صورتحال کو دیکھتے ہوئے اب ہر کوئی پاکستان میں پیش کی جانے والی نئی گاڑیوں پر نظریں مرکوز رکھا ہوا ہے۔ نئے اداروں کے علاوہ پہلے سے موجود گاڑیاں بنانے والے ادارے جیسا کہ ٹویوٹا بھی نئی گاڑیاں پیش کرنے پر غور کر رہا ہے۔ ذیل میں ہم ایسی سیڈان گاڑیوں سے متعلق آپ کو بتا رہے ہیں جو سال 2020 میں پاکستان میں پیش کی جاسکتی ہیں۔

ٹویوٹا یارس

جاپانی ادارہ ٹویوٹا ’یارس‘ کو ایک چھوٹی (سب-کومپیکٹ) سیڈان قرار دیتا ہے۔ اسے پاکستان میں ٹویوٹا کرولا کے XLi اور GLi ماڈلز کی جگہ متعارف کروایا جائے گا اور یہ براہ راست ہونڈا سٹی کو ٹکر دے گی۔ امید ہے کہ اس کے 1300cc اور 1500cc ماڈلز پیش کیے جائیں گے۔ یاد رہے کہ ہونڈا سٹی بھی انہی انجن کے ساتھ فروخت کی جارہی ہے۔ اس کے علاوہ ٹویوٹا یارس کو مینوئل اور آٹومیٹک گئیر باکس کے ساتھ پیش کیا جانا بھی متوقع ہے۔

پاکستان میں ٹویوٹا یارس کو مارچ 2020 میں پیش کیا جاسکتا ہے اور اس کے سادہ ماڈل کی قیمت لگ بھگ 24 لاکھ روپے رکھی جاسکتی ہے۔ یارس کی اہم خصوصیات کی بات کریں تو ان میں ائیربیگز، ائیرکنڈیشننگ، پاور لاکس، پاور ونڈوز، پاور مررز، فوگ لائتص، ہیٹڈ فرنٹ سیٹس، سیٹلائیٹ نیویگیشن اور کلائمنٹ کنٹرول شامل ہے۔ اب یہ تو وقت ہی بتائے گا کہ انڈس موٹر کمپنی ان میں سے کتنی خصوصیات پاکستانی صارفین کو پیش کرتا ہے۔

ہیونڈائی الینٹرا

یہ تو آپ جانتے ہی ہوں گے کہ ہیونڈائی ہر چھ ماہ میں نئی گاڑیاں متعارف کروانے کا اشارہ دے چکا ہے اور ان ہی گاڑیوں میں سے ایک الینٹرا بھی ہے۔ اگر یہ گاڑی واقعی پاکستان میں پیش کی گئی تو اس کے ساتھ دو بڑے حریف ہونڈا سِوک اور ٹویوٹا کرولا آلٹس 1.8L ہوں گے۔ الینٹرا کا خوبصورت اور دلکش سیڈان ہے جس میں ایل ای ڈی ہیڈلائیٹس اور ٹیل لائیٹس کا آپشن بھی دیا گیا ہے۔ بین الاقوامی مارکیٹ میں الینٹرا کو تین مختلف انجن کے ساتھ پیش کیا جا رہا ہے جن میں 1400cc ٹربو انجن، 1600cc ٹربو انجن اور 2000cc انجن شامل ہے اور اس کے ساتھ مینوئل اور آٹومیٹک گئیر باکس کا آپشن بھی موجود ہے۔

صرف یہی نہیں بلکہ الینٹرا کا اسپورٹس ماڈل بھی دستیاب ہے جس میں پیڈل شفٹرز، چمڑے کی اسپورٹ فرنٹ سیٹس، چمڑے ہی سے مزین اسٹیرنگ ویل اور اسپوٹس انسٹرومنٹ کلسٹر بھی شامل ہے۔ یہ اسپورٹس ماڈل براہ راست سِوک ٹربو RS کو ٹکر دے سکتا ہے۔ امید ہے کہ ہم پاکستان میں جلد ہیونڈائی الینٹرا کو اپنی تمام تر خصوصیات کے ساتھ جلوہ گر ہوتا دیکھیں۔

کیا سیراٹو

Kia Cerato Exterior

Kia Cerato Exterior

Kia Cerato Exterior

جنوبی کوریا سے تعلق رکھنے والا ادارے کیا نے سیراٹو کو پہلی مرتبہ 2003 میں متعارف کروایا۔ اس کے بعد سے یہ سیڈان کئی ناموں سے دنیا کے مختلف ممالک کا سفر کر چکی ہے۔ کیا سیراٹو کو مختلف انجن اور گئیر باکس کے ساتھ پیش کیا جا چکا ہے۔ اور اب ہیچ بیک اور چھوٹی سیڈان گاڑی پیش کرنے کے بعد سیراٹو ہی وہ بہترین گاڑی ہے کہ جو سیڈان کے زمرے میں کیا کو شامل کروا سکتی ہے۔

اگر آپ نے کیا فورٹے کا نام سنا ہوا ہے تو آپ کو بتاتے چلیں کہ یہ دراصل کیا سیراٹو ہی کا ایک اور نام ہے۔ یا یوں کہیے کہ یہ دونوں ایک ہی گاڑی کے دو نام ہیں۔ مزے کی بات یہ ہے کہ گاڑیوں کا شوقین رکھنے والے ہمارے ایک ساتھی نے کراچی میں کیا سیراٹو کو دیکھا ہے اور اسی لیے ہمیں بہت زیادہ امید ہے کہ اسے پاکستان میں جلد پیش کیا جاسکتا ہے۔ یوں پاکستان میں سیڈان گاڑیوں خریدنے والوں کو ایک نیا اور اچھا آپشن دستیاب ہوجائے گا۔

 پروٹون ساگا

سال 2020 کے دوران پاکستان میں پروٹون ساگا پیش کیے جانے کا بھی بہت زیادہ امکان ہے۔ یوں سیڈان کے زمرے میں پہلے سے کہیں زیادہ مقابلے دیکھنے کو ملے گا۔ کیا سیراٹو کی طرح پروٹون ساگا کو بھی پاکستان میں دیکھا گیا ہے اور یہی بات اس کی پاکستان میں پیشکش کے خیال کو مزید تقویت پہنچاتی ہے۔ شاید یہ بات جان کر آپ کو حیرت ہوگی کہ پروٹون برادر اسلامی ملک ملائیشیا کی کمپنی ہے اور وہاں اس کی تیسری جنریشن پیش کی جارہی ہے جس میں 1300cc انجن لگایا گیا ہے۔

ہیونڈائی سوناٹا

Hyundai Sonata

اس فہرست میں شامل ہیونڈائی کی دوسری گاڑی کوئی اور نہیں بلکہ دنیا بھر میں سب سے زیادہ فروخت ہونے والی ہیونڈائی سوناٹا ہے۔ یہ عالمی مارکیٹ میں ٹویوٹا کیمری اور ہونڈا اکورڈ کے مقابل پیش جا رہی ہے جہاں اس کے چار ماڈل SE، SEL، SEL Plus اور Limited  پیش کیے جارہے ہیں۔ ان میں 1600cc ٹربو انجن اور 2500cc انجن کا آپشن شامل ہے۔ دیدہ زیب انداز والی یہ اوسط-سائز کی سیڈان تمام تر جدید خصوصیات اور سہولیات کی حامل ہے۔

اس وقت ہیونڈائی سوناٹا کی ساتویں جنریشن فروخت کے لیے دستیاب ہے۔ ہم امید کرتے ہیں کہ ہیونڈائی-نشاط کی شراکت داری سے یہ گاڑی نہ صرف پاکستان میں پیش کی جائے گی بلکہ مقامی سطح پر اس کی تیاری بھی جلد شروع کی جائے گی۔ سوناٹا کی قابل ذکر خصوصیات میں ہیٹڈ اور وینٹی لیٹڈ سیٹس، پارک اسسٹ، چمڑے سے مزین سیٹسس اور اسٹیئرنگ ویل اور امبیئنٹ لائٹننگ۔

پاکستان میں گاڑیوں کے شعبے سے متعلق مزید خبروں کے لیے پاک ویلز بلاگ پر آتے رہیے اور تبصرے کے حصے میں اپنے خیالات کا بھی کھل کر اظہار کیجیے۔

یہ بھی پڑھیے: نہیں ، زوتیے نے پاکستان میں الیکٹرک کار لانچ نہیں کی؟


Google App Store App Store

Top